ഇനി കൊച്ചി മെട്രോയില്‍ യാത്ര ചെയ്യാന്‍ ടിക്കറ്റ് എടുക്കുന്നത് ഏറെ എളുപ്പം. ഒന്നല്ല നിരവധി ആപ്പുകളില്‍ നിന്ന് ടിക്കറ്റ് ഓണ്‍ലൈനായി എടുക്കാനുള്ള സംവിധാനം ഒരുക്കിയിരിക്കുകയാണ് കൊച്ചി മെട്രോ. പേടിഎം, ഫോണ്‍പേ, നമ്മ യാത്രി, റെഡ് ബസ്, റാപ്പിഡോ എന്നീ ആപ്പുകളിലൂടെ ടിക്കറ്റെടുക്കാം. ഓപ്പണ്‍ നെറ്റ്  വര്‍ക്ക് ഫോര്‍ ഡിജിറ്റല്‍ കൊമേഴ്‌സുമായി (ഒഎന്‍ഡിസി) ചേര്‍ന്നാണ് ഈ സൌകര്യമൊരിക്കിയത്. 

ഓണ്‍ലൈനായി എടുക്കുന്ന ടിക്കറ്റുകളുടെ പ്രിന്റ് ഔട്ട് ആവശ്യമില്ല. മെട്രോ സ്റ്റേഷനിലെ എന്‍ട്രന്‍സില്‍ സ്‌കാന്‍ ചെയ്ത് അകത്തും പുറത്തും പ്രവേശിക്കാം. നേരത്തെ ചെന്നൈ മെട്രോ ഒഎന്‍ഡിസിയുമായി ചേര്‍ന്ന് ഇത്തരത്തില്‍ ആപ്പിലൂടെ ടിക്കറ്റ് എടുക്കാന്‍ സംവിധാനം ഒരുക്കിയിരുന്നു. ഒരു യാത്രയ്ക്കുള്ള ടിക്കറ്റോ മടക്ക യാത്രയും കൂടിയോ ഇത്തരത്തില്‍ ഓണ്‍ലൈനായി എടുക്കാം. ഓണ്‍ലൈന്‍ ടിക്കറ്റിന് ബുക്കിങ് ചാര്‍ജ് ഈടാക്കില്ലെന്നും മെട്രോ അറിയിച്ചു.

നേരത്തെ വാട്‌സ് ആപ്പ് ടിക്കറ്റ് ബുക്കിങ് മെട്രോ കൊണ്ടുവന്നിരുന്നു. ഊബര്‍ വഴിയും ഈസ് മൈ ട്രിപ്പ് വഴിയും മെട്രോ ടിക്കറ്റ് എടുക്കാനുള്ള സംവിധാനം വൈകാതെയുണ്ടാകും. മെട്രോ യാത്രക്കാരുടെ എണ്ണം കൂടുന്ന സാഹചര്യത്തില്‍ ടിക്കറ്റ് കൌണ്ടറുകളിലെ തിരക്ക് കുറയ്ക്കാനാണ് ഓണ്‍ലൈന്‍ സംവിധാനം ഏര്‍പ്പെടുത്തുന്നത്.