ഇരിട്ടി: വൈദ്യുത ലൈന്‍ വലിക്കാനായി സ്ഥാപിച്ച ഇലക്ട്രിക് പോസ്റ്റ് മണിക്കൂറുകള്‍ക്കകം ഒടിഞ്ഞു വീണു. കീഴൂര്‍ മഹാദേവക്ഷേത്രത്തിന് മുന്‍ വശത്ത് കീഴൂര്‍ റോഡില്‍ കഴിഞ്ഞ ദിവസം സ്ഥാപിച്ച സിമന്റ് ഇലക്ട്രിക് പോസ്റ്റാണ് ലൈന്‍ വലിക്കുന്നതിന് മുമ്പെ ഒടിഞ്ഞ് വീണത്.
പോസ്റ്റ് വീണത് രാത്രി ആയതിനാല്‍ വന്‍ അപകടമാണ് ഒഴിവായത്. കീഴൂര്‍ വി.യു.പി സ്‌കൂളിലെയും, ഇരിട്ടി ഹയര്‍ സെക്കന്‍ഡറി സ്‌കൂളിയെയും, നിവേദിതാ വിദ്യാലയത്തിലേയും നൂറു കണക്കിന് വിദ്യാര്‍ഥികളും അനേകം വാഹനങ്ങളും കടന്നു പോകുന്ന പാതയാണിത്.
ഗുണ നിലവാരം കുറഞ്ഞ പോസ്റ്റുകളാണ് വൈദ്യുതി വകുപ്പ് ഉപയോഗിക്കുന്നതെന്ന് ആരോപണം ശക്തമായിട്ടുണ്ട്. കൂടാതെ കാലപഴക്കം മൂലം തുരുമ്പിച്ച കമ്പികളാണ് ഇതിനുള്ളിലെന്ന് നാട്ടുകാര്‍ പറയുന്നു. ഇത്തരത്തിലുള്ള ഒട്ടേറെ ഇലക്ട്രിക് പോസ്റ്റുകളാണ് വര്‍ഷങ്ങളായി  വിവിധ സ്ഥലങ്ങളില്‍ വഴിയരികില്‍ കാട് പിടിച്ച് കിടക്കുന്നത്.
ഈ പ്രദേശത്ത് ലൈന്‍ വലിക്കാനായി സ്ഥാപിച്ച മറ്റ് പോസ്റ്റുകളുടെ ഗുണ നിലവാരം ഉറപ്പ് വരുത്തണമെന്നും നാട്ടുകാര്‍ പറയുന്നു.