നേമം: പളളിച്ചല്‍ പഞ്ചായത്ത് മുന്‍ പ്രസിഡന്റും നിലവില്‍ നടുക്കാട് വാര്‍ഡ് മെമ്പറുമായ കെ.രാകേഷ് ഉള്‍പ്പെടെ എതാനും കോണ്‍ഗ്രസ് പ്രവര്‍ത്തകര്‍ സി.പി.ഐയില്‍ ചേര്‍ന്നു.
നിലവില്‍ കോണ്‍ഗ്രസ് ഭരിക്കുന്ന പളളിച്ചല്‍ പഞ്ചായത്തില്‍ ഭരണ സമിതിയുടെ കെടുകാര്യസ്ഥതയില്‍ പ്രതിഷേധിച്ചാണ് കോണ്‍ഗ്രസ് പ്രവര്‍ത്തകര്‍ സി.പി.ഐയില്‍ ചേരാന്‍ കാരണമായി പറയുന്നത്. എന്നാല്‍ കോണ്‍ഗ്രസ് പ്രവര്‍ത്തകനായിരുന്ന രാകേഷിനെ അച്ചടക്ക ലംഘനത്തെ തുടര്‍ന്ന് കഴിഞ്ഞ പഞ്ചായത്ത് ഇലക്ഷന് മുന്‍പ് തന്നെ കോണ്‍ഗ്രസ് പാര്‍ട്ടിയില്‍നിന്നും പുറത്താക്കിയിരുന്നു. തുടര്‍ന്ന് രാകേഷ് പള്ളിച്ചല്‍ പഞ്ചായത്തിലെ സ്വന്തം സ്ഥലമായ നടുക്കാട് വാര്‍ഡില്‍ നിന്നും സ്വതന്ത്രനായി മത്സരിച്ച് വിജയിക്കുകയായിരുന്നു. കഴിഞ്ഞദിവസം സി.പി.ഐ നേതാവ് പള്ളിച്ചല്‍ വിജയന്റെ അധ്യക്ഷതയില്‍ ചേര്‍ന്ന യോഗത്തില്‍ സി.പി.ഐ ജില്ലാ സെക്രട്ടറി ജി.ആര്‍ അനില്‍ രാകേഷിനെ ഷാള്‍ അണിയിച്ച് സ്വീകരിക്കുകയായിരുന്നു. ചടങ്ങില്‍ സി.പി.ഐ കാട്ടാക്കട മണ്ഡലം സെക്രട്ടറി വിളപ്പില്‍ രാധാകൃഷ്ണന്‍, ജില്ലാ കമ്മിറ്റി അംഗം എന്‍. ഭാസുരാംഗന്‍, ശ്രീകണ്ഠന്‍നായര്‍, പുവച്ചല്‍ ഷാഹുല്‍, ടി.ശശി, എന്‍.ഭുവനചന്ദ്രന്‍ തുടങ്ങിയവര്‍ സംസാരിച്ചു.