ഖാര്‍ത്തൂം: ദാര്‍ഫര്‍ മേഖലയില്‍ രാസായുധങ്ങള്‍ ഉപയോഗിച്ച് സുദാന്‍ മുപ്പതിലേറെ തവണ ആക്രമണം നടത്തിയതായി റിപ്പോര്‍ട്ട്. കഴിഞ്ഞ ദിവസം ആംനെസ്റ്റി ഇന്റര്‍നാഷനല്‍ പുറത്തുവിട്ട റിപ്പോര്‍ട്ടിലാണു വിവരം.
ആക്രമണങ്ങളില്‍ കുട്ടികളും സ്ത്രീകളുമുള്‍പ്പെടേ 250ലേറെ പേരാണു കൊല്ലപ്പെട്ടത്. സാറ്റലൈറ്റ് ദൃശ്യങ്ങളെയും 200ലേറെ അഭിമുഖങ്ങളെയും ആധാരമാക്കിയാണ് ആംനെസ്റ്റി റിപ്പോര്‍ട്ട് തയാറാക്കിയത്. ഏറ്റവുമൊടുവിലായി ഈ മാസം ഒന്‍പതിനാണു മേഖലയില്‍ സൈന്യത്തിന്റെ ആക്രമണമുണ്ടായത്. എന്നാല്‍, റിപ്പോര്‍ട്ട് സുദാന്‍ സര്‍ക്കാര്‍ തള്ളിക്കളഞ്ഞു. തങ്ങളൊരിക്കലും രാസായുധങ്ങള്‍ ഉപയോഗിച്ചിട്ടില്ലെന്നും സുദാന്‍ സൈനികവൃത്തങ്ങള്‍ പറഞ്ഞു.