തളിപ്പറമ്പ്: പരിയാരം മെഡിക്കല്‍ കോളജില്‍ നവമിപൂജക്ക് വിലക്കേര്‍പ്പെടുത്തിയതായി ആരോപണം. മുന്‍ ഭരണസമിതികള്‍ പൂജ ആഘോഷങ്ങളുടെ ഭാഗമായി പ്രത്യേകം ഫണ്ട് തന്നെ അനുവദിച്ചിരുന്നെങ്കിലും കഴിഞ്ഞ വര്‍ഷം മുതല്‍ വിലക്കുകള്‍ ഉണ്ടായിരുന്നു.
അതിനാല്‍ വിശ്വാസത്തിന്റെ ഭാഗമായി ഇത്തവണ പൂജ നടത്താന്‍ അനുവദിക്കണമെന്ന് എം.ഡിയെ നേരില്‍ കണ്ട് ആവശ്യപ്പെട്ടുവെങ്കിലും പൂജ നടത്തേണ്ടതില്ലെന്ന് വാക്കാല്‍ നിര്‍ദേശം നല്‍കുകയായിരുന്നുവന്ന് ജീവനക്കാര്‍ പറയുന്നു.
വര്‍ഷങ്ങളായി ആശുപത്രിയില്‍ മഹാനവമിദിനത്തില്‍ നടന്നുവന്നിരുന്ന പൂജകള്‍ക്ക് ഇത്തവണ അനുമതി നല്‍കാതിരുന്നത് വിവാദമായിട്ടുണ്ട്. എന്നാല്‍ വിവിധ വിഭാഗത്തില്‍ പെട്ടവര്‍ ജോലിചെയ്യുന്ന മെഡിക്കല്‍ കോളജില്‍ നവമിപൂജ അനുവദിക്കാനാവില്ലെന്നും മുന്‍ കാലങ്ങളില്‍ പൂജ നടത്തിയതു തന്റെ ശ്രദ്ധയില്‍ പെട്ടിട്ടില്ലെന്നും എം.ഡി പറഞ്ഞു.