കൊച്ചി: ഫെഡറല്‍ ബാങ്കിന്റെ അറ്റാദായത്തില്‍ 24.77 ശതമാനം വര്‍ധന കൈവരിക്കാനായതായി 2016 സെപ്റ്റംബര്‍ 30 ന് അവസാനിച്ച ത്രൈമാസത്തേക്കുള്ള ഓഡിറ്റു ചെയ്യാത്ത സാമ്പത്തിക ഫലങ്ങള്‍ ചൂണ്ടിക്കാട്ടുന്നു.

201.24 കോടി രൂപയുടെ അറ്റാദായമാണ് സെപ്റ്റംബര്‍ 30 ന് അവസാനിച്ച ത്രൈമാസത്തില്‍ രേഖപ്പടുത്തിയിട്ടുള്ളത്. 474.93 കോടി രൂപയുടെ പ്രവര്‍ത്തന ലാഭവും ഇക്കാലയളവില്‍ കൈവരിക്കാന്‍ ബാങ്കിനായിട്ടുണ്ട്. 41.11 ശതമാനം വര്‍ധനവാണ് പ്രവര്‍ത്തന ലാഭത്തിന്റെ കാര്യത്തില്‍ കൈവരിക്കാനായിട്ടുള്ളത്. ആകെ വരുമാനം 24.93 ശതമാനം വര്‍ധനവോടെ 987.73 കോടി രൂപയിലും എത്തിയിട്ടുണ്ട്.

പലിശ ഇനത്തിലുള്ള അറ്റ വരുമാനം 19.22 ശതമാനം വര്‍ധിച്ച് 725.24 കോടി രൂപയിലെത്തിയതായും പ്രവര്‍ത്തന ഫലം കാണിക്കുന്നു.

ആകെ വായ്പകളുടെ കാര്യത്തില്‍ ഉണ്ടായ 26.63 ശതമാനം വര്‍ധനവിന്റെ പിന്‍ബലത്തില്‍ ബാങ്കിന്റെ ആകെ ബിസിനസ് വാര്‍ഷികാടിസ്ഥാനത്തില്‍ 21.13 ശതമാനം വളര്‍ച്ചയോടെ 150986 കോടി രൂപയിലെത്തിയതായും പ്രവര്‍ത്തന ഫലം കാണിക്കുന്നു. ആകെ വായ്പകള്‍ 51675.89 കോടി രൂപയില്‍ നിന്ന് 65439.31 കോടി രൂപയിലേക്കാണ് എത്തിയത്. 2015 സെപ്റ്റംബര്‍ 30 ന് 73783.20 കോടി രൂപയായിരുന്ന ആകെ നിക്ഷേപങ്ങള്‍ ഈ വര്‍ഷം സെപ്റ്റംബര്‍ 30 ന് 86299.10 കോടി രൂപയിലെത്തിയിട്ടുണ്ട്.

ഫെഡറല്‍ ബാങ്കിന്റെ എന്‍.ആര്‍.ഇ. നിക്ഷേപങ്ങള്‍ 19.26 ശതമാനം വളര്‍ച്ചയോടെ 32459.20 കോടി രൂപയിലെത്തിയിട്ടുണ്ട്.  കറണ്ട് അക്കൗണ്ട്, സേവിങ്‌സ് അക്കൗണ്ടുകളുടെ കാര്യത്തില്‍ 13.92  ശതമാനം വര്‍ധനവോടെ 26786.93 കോടി രൂപയിലെത്തിയതായും പ്രവര്‍ത്തന ഫലങ്ങള്‍ ചൂണ്ടിക്കാട്ടുന്നു. ബാങ്കിന്റെ ആകെ നിഷ്‌ക്രിയ ആസ്തികള്‍ ആകെ വായ്പകളുടെ 2.78 ശതമാനമെന്ന നിലയില്‍ 1819.72 കോടി രൂപയാണ്. അറ്റ നിഷ്‌ക്രിയ ആസ്തികളാകട്ടെ 1.61 ശതമാനമെന്ന നിലയില്‍ 1039.74 കോടി രൂപയാണ്.