പാനൂര്‍: ഡി.വൈ.എഫ്.ഐ പ്രതിഷേധ പ്രകടനത്തിനു നേരെ ബോംബേറ് നടന്ന കുന്നോത്തുപറമ്പില്‍ നിന്നും രണ്ടു ബോംബുകള്‍ കണ്ടെത്തി. ബോംബ് സ്‌ക്വാഡിന്റെ സഹായത്തോടെ പൊലിസ് നടത്തിയ മിന്നല്‍ പരിശോധനയിലാണ് രണ്ട് നാടന്‍ ബോംബുകള്‍ കണ്ടെത്തിയത്. ആക്രമണം നടന്ന സ്ഥലത്തെ ഓവുചാലില്‍ സൂക്ഷിച്ച നിലയിലായിരുന്നു ഇവ. ബോംബുകളില്‍ ഒന്ന് പൊട്ടിയ നിലയിലായിരുന്നു. പാനൂര്‍ സി.ഐ കെ.എസ് ഷാജിയുടെയും ബോംബ് സ്‌ക്വാഡ് എ.എസ്.ഐ എം.സി.ജിയാസിന്റെയും നേതൃത്വത്തിലായിരുന്നു പരിശോധന.ബോംബുകള്‍ കണ്ടെത്തിയ സാഹചര്യത്തില്‍ പരിശോധന തുടരാനാണ് പൊലിസിന്റെ തീരുമാനം. കൊളവല്ലൂര്‍ എസ്.ഐ ബിജു, ബോംബ് സ്‌ക്വാഡ് അംഗങ്ങളായ രാജേഷ്, ബിനീഷ് എന്നിവരും റെയ്ഡില്‍ പങ്കെടുത്തു. കഴിഞ്ഞ ദിവസം രാത്രി ഡി.വൈ.എഫ്.ഐ പ്രകടനത്തിനു നേരെയുണ്ടായ ബോംബേറില്‍ രണ്ട് പേര്‍ക്ക് പരുക്കേറ്റിരുന്നു. സംഭവത്തില്‍ പ്രതിഷേധിച്ച് ഇന്നലെ കുന്നോത്തുപറമ്പില്‍ സി.പി.എം ആഹ്വാന പ്രകാരം ഹര്‍ത്താലാചരിച്ചു.