ആലപ്പുഴ :കൊല്ലം - ആലപ്പുഴ ജില്ലകളിലെ തീരമേഖലയില്‍ സര്‍ക്കാര്‍ അനുമതിയോടെ ഇന്ത്യന്‍ റെയര്‍ എര്‍ത്ത്‌സ് അടക്കമുളള പൊതുമേഖലാ സ്ഥാപനങ്ങള്‍ നടത്തുന്ന കരിമണല്‍ ഖനനം നിര്‍ത്തിവെക്കാന്‍ നടപടി സ്വീകരിക്കണമെന്ന് യു.ഡി.എഫ് ആലപ്പുഴ ജില്ലാ ചെയര്‍മാനും മുന്‍ എം.എല്‍.എയുമായ എം മുരളി വാര്‍ത്തസമ്മേളനത്തില്‍ ആവശ്യപ്പെട്ടു. കടലും കായലും ഒന്നിക്കുന്ന ഖനനം പാടില്ലെന്നത് കോണ്‍ഗ്രസിന്റെ പ്രഖ്യാപിത ലക്ഷ്യങ്ങളിലൊന്നാണ്. നേരത്തെ യു.ഡി.എഫില്‍ ഇതുസംബന്ധിച്ച് ഘടകകക്ഷികള്‍ തമ്മില്‍ അഭിപ്രായ വ്യത്യാസം ഉണ്ടായിരുന്നു.
ഇപ്പോള്‍ ആ സ്ഥിതിയില്‍ മാറ്റം വന്നിട്ടുണ്ട്. കെ.പി.സി.സി പ്രസിഡന്റിന്റെ നിലപാടുകള്‍ക്ക് പിന്നില്‍ യു.ഡി.എഫ് ഒറ്റക്കെട്ടാണ്. ഖനനത്തിനായി പൊതു മേഖലയ്‌ക്കൊപ്പം സ്വകാര്യമേഖലയും ശ്രമിക്കുന്നുണ്ട്. ഇത് ചെറുക്കാന്‍ സര്‍ക്കാര്‍ തയ്യാറാകണം. ഖനനം സംബന്ധിച്ച് സുപ്രിംകോടതി വിധിയില്‍ സര്‍ക്കാരിന് തീരുമാനം എടുക്കാമെന്നാണ് പറഞ്ഞിട്ടുളളത്.
ഈ സാഹചര്യത്തില്‍ കോടികള്‍ വിലമതിക്കുന്ന തോറിയവും ഇല്‍മുനേറ്റും അടങ്ങിയ കരിമണല്‍ സംരക്ഷിക്കാന്‍ സര്‍ക്കാര്‍ നടപടി സ്വീകരിക്കണമെന്നും മുരളി പറഞ്ഞു.