ദോഹ: വെല്ലുവിളികള്‍ നിറഞ്ഞുനില്‍ക്കുന്ന ഈ കാലഘട്ടത്തില്‍ ഉന്നതമായ ധാര്‍മികമൂല്യങ്ങള്‍ ഉയര്‍ത്തിപ്പിടിക്കുന്ന ഒരു സമൂഹമാണ് ഈ കാലഘട്ടത്തിനു ആവശ്യമെന്നു സമസ് കേന്ദ്ര മുശാവറ അംഗം ചേലക്കാട് മുഹമ്മദ് മുസ്‌ലിയാര്‍ പ്രസ്താവിച്ചു. ഖത്തര്‍ ചേലക്കാട് മഹല്ല് മുസ്‌ലിം റിലീഫ് കമ്മിറ്റി ഒരുക്കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. ശരീഅത്തിനെതിരായി ഇപ്പോള്‍ കേന്ദ്ര ഭരണകൂടം നടത്തുന്ന ശ്രമങ്ങളെ മുസ്‌ലിംകളും മറ്റെല്ലാ വിഭാഗങ്ങളും ഒറ്റക്കെട്ടായി നേരിടണമെന്നും ഭരണഘടന ഉറപ്പു നല്‍കിയ മതസ്വാതന്ത്ര്യം നിലനിര്‍ത്തേണ്ടത് തെരഞ്ഞടുക്കപ്പെട്ട സര്‍ക്കാരുകളുടെ ബാധ്യതയാണെന്നും അദ്ദേഹം പറഞ്ഞു. സഫാരി ഗ്രൂപ്പ് ജനറല്‍ മാനേജര്‍ സൈനുല്‍ ആബിദീന്‍ യോഗം ഉദ്ഘാടനം ചെയ്തു. കെ.കെ ബഷീര്‍ അധ്യക്ഷത വഹിച്ചു. റഷീദ് കോട്ടയില്‍ ഉപഹാര സമര്‍പ്പണം നടത്തി. പി.വി മുഹമ്മദ് മൗലവി,പി.വി അമ്മദ് ഹാജി, ശംസുദ്ദീന്‍ വാണിമേല്‍,കെ.വി ഹുസൈന്‍, ഉബൈദ് കുമ്മങ്കോട് സംസാരിച്ചു. അബ്ദുല്ല നടുക്കണ്ടി, അസ്ഹര്‍ സി എച്ച്, ഷഫീക്ക് നന്തോത്ത്,അക്കു അഷ്‌ക്കര്‍ സംബന്ധിച്ചു. എ.ടി ഫൈസല്‍ സ്വാഗതവും വി.കെ മുഹമ്മദലി നന്ദിയും പറഞ്ഞു.