ബാലുശ്ശേരി: ഇരു വശത്തെയും കരിങ്കല്‍ കെട്ടുകള്‍ തകര്‍ന്ന് രാമല്ലൂര്‍ കുനിയടി കൊറന്നാറുകണ്ടി താഴം പാലം അപകടാവസ്ഥയിലായി. പാലത്തിന് കൈവരിയില്ലാത്തതും അപകട സാധ്യത വര്‍ധിപ്പിക്കുന്നു. ഇരു ഭാഗത്തു നിന്നും വാഹനങ്ങള്‍  ഒരുമിച്ചെത്തിയാല്‍ കടന്നുപോകാന്‍ പറ്റാത്ത അവസ്ഥയാണുള്ളത്.
പാലത്തിന്റെ തകര്‍ച്ച പ്രദേശ വാസികള്‍ അധികൃതരുടെ ശ്രദ്ധയില്‍പ്പെടുത്തിയിട്ടും നടപടിയായില്ല. സ്വകാര്യ ബസുകള്‍ക്കു പുറമെ നിരവധി സ്‌കൂള്‍ ബസുകളും അപകടാവസ്ഥയിലായ പാലത്തിലൂടെയാണ് കടന്നുപോകുന്നത്. ബാലുശ്ശരി -കോഴിക്കോട് റോഡിലും നന്മണ്ട-നരിക്കുനി റോഡിലും ഗതാഗത തടസം ഉണ്ടാകുമ്പോഴും വാഹനങ്ങള്‍ ഇത് വഴിയാണ് തിരിച്ചു വിടാറുള്ളത്. അപകടാവസ്ഥ പരിഹരിക്കുകയും പാലത്തിന് അടിയന്തിരമായി കൈവരികള്‍ സ്ഥാപിക്കുകയും വേണമെന്നാണ് നാട്ടുകാരുടെ ആവശ്യം.