ചെന്നൈ: രോഗങ്ങള്‍ ആക്രമിച്ചു തുടങ്ങിയതോടെ ആഴ്ചയില്‍ മൂന്നു ദിവസം മാത്രമാണ് ജയലളിത സെക്രട്ടറിയേറ്റിലെ മുഖ്യമന്ത്രിയുടെ ഓഫിസില്‍ എത്തിയിരുന്നത്. രണ്ട് മണിക്കൂര്‍ മാത്രം ചെലവഴിച്ച് മടങ്ങുകയും ചെയ്യുമായിരുന്നു. പ്രധാന ഫയലുകള്‍ ഭൂരിഭാഗവും പോയസ് ഗാര്‍ഡനില്‍ വച്ചാണ് പരിശോധിച്ചിരുന്നത്.
മറ്റു ജില്ലകളിലെ പുതിയ പദ്ധതികളുടെ ഉദ്ഘാടനങ്ങള്‍ വിഡിയോ കോണ്‍ഫറന്‍സ് വഴിയാണ് നിര്‍വഹിച്ചത്. ഏറ്റവും അവസാനമായി ജയലളിത പങ്കെടുത്ത ഔദ്യോഗിക പരിപാടി ചെന്നൈയിലെ മെട്രോ ട്രെയിനിന്റെ ഉദ്ഘാടനമായിരുന്നു. കഴിഞ്ഞ മാസം 21ന് രാവിലെ ചെന്നൈ സെക്രട്ടേറിയറ്റിലിരുന്നാണ് എയര്‍പോര്‍ട്ടിനും ചിന്നമലയ്ക്കുമിടയിലെ മെട്രോ ട്രെയിന്‍ ജയലളിത ഉദ്ഘാടനം ചെയ്തത്. തമിഴ്‌നാട്ടില്‍ പൂര്‍ണ മദ്യനിരോധനമായിരുന്നു ജയലളിതയുടെ ഏറ്റവും വലിയ ആഗ്രഹം. മുന്‍പ് ലോട്ടറി നിരോധിച്ചതു ജയലളിതയായിരുന്നു. താന്‍ വീണ്ടും അധികാരത്തിലെത്തിയാല്‍ സംസ്ഥാനത്തു പൂര്‍ണ മദ്യനിരോധനം നടപ്പിലാക്കുമെന്ന് ജയലളിത രണ്ട് തവണ തെരഞ്ഞെടുപ്പ് സമയത്തു പ്രഖ്യാപിച്ചെങ്കിലും നടപ്പിലാക്കാന്‍ കഴിഞ്ഞില്ല.
സംസ്ഥാനത്തിന്റെ ഏറ്റവും വലിയ സാമ്പത്തിക സ്രോതസ് മദ്യവില്‍പനയിലായതുകാരണം ഇതിനുള്ള പരിഹാരമാര്‍ഗങ്ങള്‍ കണ്ടെത്താനും കഴിഞ്ഞില്ല. മദ്യത്തിനെതിരേ നീങ്കള്‍ നല്ലായിരിക്കണം എന്ന പേരില്‍ 1991 ല്‍ ജയലളിത നിഴല്‍കള്‍ രവി, ഭാനുപ്രിയ, മനോരമ, ചന്ദ്രശേഖര്‍ എന്നീ താരങ്ങളെ വച്ച് ബോധവല്‍ക്കരണ സിനിമയും നിര്‍മിച്ചു.