റിയാദ്: സിറിയയില്‍ കൂട്ടക്കുരുതി നടത്തുന്ന ബശ്ശാറുല്‍ അസദിന്റെ കിരാത നടപടിയെ സഊദി മന്ത്രിസഭ അതിശക്തതമായി അപലപിച്ചു. അലപ്പോയിലെ മനുഷ്യക്കരുതി അവസാനിപ്പിക്കാന്‍ യു.എന്‍ സെക്യൂരിറ്റി കൗണ്‍സില്‍ അടിന്തിരമായി ഇടപെടണമെന്നും മന്ത്രിസഭ യോഗം ആവശ്യപ്പെട്ടു.\

സല്‍മാന്‍ രാജാവിന്റെ അധ്യക്ഷതയില്‍ തലസ്ഥാനത്തെ അല്‍യമാമ കൊട്ടാരത്തില്‍ തിങ്കളാഴ്ച ചേര്‍ന്ന മന്ത്രിസഭ യോഗമാണ് അലപ്പോ സംഭവങ്ങളെ വന്‍ ദുരന്തമായി പ്രഖ്യാപിച്ചത്.

നിരപരാധികളായ ജനതക്കു മേല്‍ മൃഗീയമായി ബോംബുകള്‍ ഒഴുക്കുകയാണ്. ആക്രമണത്തില്‍ നിരവധി പേര്‍ കൊല്ലപ്പെടുകയും അതിന്റെ പതിന്‍മടങ്ങ് ആളുകള്‍ക്ക് പരുക്കേല്‍ക്കുകയും ചെയ്തു. മാനുഷിക അവകാശങ്ങള്‍ പോലും അലപ്പോയില്‍ നിഷേധിക്കപ്പെടുകയാണ്.

ഇതിന് അറുതി വരുത്താന്‍ യു.എന്‍ സെക്യൂരിറ്റി കൗണ്‍സില്‍ ഐക്യരാഷ്ട്ര സഭ ചാര്‍ട്ടര്‍ വ്യവസ്ഥ ചെയ്യുന്നത് പ്രകാരം ഉത്തരവാദിത്വ ബോധത്തോടെ ഇടപെടണംമെന്നും ക്യാബിനറ്റ് യോഗം ആവശ്യപ്പെട്ടു.

യമനിലെ ഏദനിലുണ്ടായ തീവ്രവാദ ആക്രമണത്തെയും ജോര്‍ദാന്‍, തുര്‍ക്കി എന്നിവിടങ്ങളിലുണ്ടായ തീവ്രവാദി ആക്രമണങ്ങളെയും അപലപിച്ച യോഗം ഈ രാജ്യങ്ങള്‍ക്ക് സഊദിയുടെ അനുശോചനം അറിയിച്ചു.