കാസര്‍കോട്: അടുത്ത ദിവസങ്ങളിലായി മുള്ളേരിയയിലെ അഭിലാഷും വെള്ളൂര്‍ കനകത്തൊടിയിലെ രമേഷും മരിക്കാനിടയായതിന്റെ പൂര്‍ണ ഉത്തരവാദിത്വം സര്‍ക്കാരിനും ആരോഗ്യവകുപ്പിനുമാണെന്ന് എന്‍ഡോസള്‍ഫാന്‍ പീഡിത ജനകീയമുന്നണി ആരോപിച്ചു. വെള്ളൂരിലെ രമേശ് അജ്ഞാത രോഗം ബാധിച്ച് വിദഗ്ദ ചികിത്സക്കായി മെഡിക്കല്‍ ക്യാംപിനു വേണ്ടി കാത്തു നില്‍ക്കുകയായിരുന്നു. ആവശ്യമായ ചികിത്സ ലഭിക്കാത്തതു കാരണമാണു രണ്ടു പേരും മരിക്കാനിടയായത്. ചികിത്സാ രംഗത്തുള്ള പിഴവുകളെ മറികടക്കുന്നില്ലെങ്കില്‍ ഇനിയും മരണം കൂടും. എന്‍ഡോസള്‍ഫാന്‍ ദുരിതബാധിതര്‍ക്കു വേണ്ടി നിയോഗിക്കപ്പെട്ട ആരോഗ്യപ്രവര്‍ത്തകരെ പുനഃസ്ഥാപിക്കണം.  ഇതോടൊപ്പം, ദുരിത ബാധിതരുടെ വെട്ടിക്കുറച്ച റേഷന്‍ പുനഃസ്ഥാപിക്കുകയും കടബാധ്യത പരിഹരിക്കുകയും വേണം. പ്രശ്‌നങ്ങള്‍ പരിഹരിച്ചില്ലെങ്കില്‍ അമ്മമാര്‍ സമര രംഗത്തേക്കു വരുമെന്നും പീഡിത ജനകീയ മുന്നണി സെക്രട്ടറി അമ്പലത്തറ കുഞ്ഞികൃഷ്ണന്‍ പ്രസ്താവനയില്‍ പറഞ്ഞു.