കൊച്ചി: 80 വയസുകാരിയായ വൃദ്ധമാതാവിനെ സംരക്ഷിക്കാന്‍ മക്കള്‍ പണം നല്‍കണമെന്ന് വനിതാകമ്മിഷന്‍ നിര്‍ദേശിച്ചു. ഇന്നലെ ടി.ഡി.എം ഹാളില്‍ നടന്ന വനിതാകമ്മിഷന്‍ സിറ്റിങ്ങിലാണു വൃദ്ധമാതാവിന് 4000 രൂപ വീതം എല്ലാ മാസവും മക്കള്‍ നല്‍കണമെന്നു വിധിയായത്.
മൂന്നുമക്കളുള്ള മാതാവിന് ഒരു മകന്‍ കൂടെ നിര്‍ത്തി സംരക്ഷിക്കുന്നുണ്ടെങ്കിലും മറ്റു രണ്ടു മക്കള്‍ ചികിത്സാചെലവോ ആഹാരത്തിനുള്ള പണമോ നല്‍കാന്‍ തയ്യാറായില്ല. ഇവര്‍ രണ്ടു പേരും 2000 രൂപ വീതം നല്‍കണമെന്നാണ് കമ്മിഷന്‍ വിധി പുറപ്പെടുവിച്ചത്.
27 ലക്ഷം രൂപയുടെ ഫഌറ്റ് ലഭിക്കാത്തതിനെത്തുടര്‍ന്നു വീട്ടമ്മ നല്‍കിയ പരാതിയും തീര്‍പ്പാക്കി. മൊത്തം 75 പരാതികളാണ് അദാലത്തിനു മുന്നിലെത്തിയത്. 31 എണ്ണം തീര്‍പ്പാക്കി. 25 എണ്ണം മാറ്റിവെച്ചു. 12 പരാതികള്‍ പൊലിസിനു കൈമാറി. നാലെണ്ണം റവന്യു വകുപ്പിനും മൂന്നെണ്ണം കൗണ്‍സിലിംഗിന് വിധേയമാക്കാനും കൈമാറി.
വനിതാകമ്മിഷന്‍ അംഗങ്ങളായ ഡോ. ലിസി ജോസ്, ഷിജി ശിവജി എന്നിവരും അഡ്വക്കേറ്റുമാരായ ജോണ്‍ എബ്രഹാം, മേഘദിനേശ്, സതീശ് സക്കറിയ തുടങ്ങിയവരും പങ്കെടുത്തു.