സിഡ്‌നി: ആസ്‌ത്രേലിയക്കെതിരായ മൂന്നാം ക്രിക്കറ്റ് ടെസ്റ്റില്‍ പാകിസ്താന്‍ തിരിച്ചടിക്കുന്നു. ഓസീസിന്റെ വമ്പന്‍ സ്‌കോറായ എട്ടിന് 538 റണ്‍സിനെതിരേ രണ്ടാം ദിനം കളിയവസാനിക്കുമ്പോള്‍ രണ്ടിന് 126 എന്ന നിലയിലാണ് പാകിസ്താന്‍. യൂനിസ് ഖാന്‍(64*) അസ്ഹര്‍ അലി(58*) എന്നിവര്‍ അര്‍ധസെഞ്ച്വറി നേടി ക്രീസിലുണ്ട്.

ആറു റണ്‍സിനിടെ രണ്ടു വിക്കറ്റ് നഷ്ടപ്പെട്ട് തകര്‍ച്ചയെ നേരിട്ട പാകിസ്താനെ 120 റണ്‍സ് മൂന്നാം വിക്കറ്റില്‍ കൂട്ടിച്ചേര്‍ത്ത് മത്സരത്തിലേക്ക് തിരിച്ചു കൊണ്ടുവരികയായിരുന്നു യുനിസും അസ്ഹര്‍ അലിയും, യൂനിസ് ഏഴു ബൗണ്ടറിയും അസ്ഹര്‍ അലി അഞ്ചു ബൗണ്ടറിയും അടിച്ചിട്ടുണ്ട്. എട്ടു വിക്കറ്റ് ശേഷിക്കെ കങ്കാരുക്കളുടെ സ്‌കോറിനൊപ്പമെത്താന്‍ 412 റണ്‍സ് ആവശ്യമാണ് പാക് ടീമിന്.

നേരത്തെ മൂന്നിന് 365 എന്ന സ്‌കോറിന് ബാറ്റിങ് പുനഃരാരംഭിച്ച ആസ്‌ത്രേലിയ മാറ്റ് റെന്‍ഷാ(184) പീറ്റര്‍ ഹാന്‍ഡ്‌സ്‌കോമ്പ്(110)എന്നിവരുടെ സെഞ്ച്വറിയുടെ മികവിലാണ് സ്‌കോര്‍ 500 കടത്തിയത്. ഹില്‍ട്ടന്‍ കാറ്റ്‌റൈറ്റ്(37) മാത്യു വേഡ്(29) എന്നിവര്‍ പിന്തുണ നല്‍കി.