തിരൂരങ്ങാടി: മഹാത്മാഗാന്ധി ഇന്ത്യയുടെ ബ്രാന്‍ഡല്ല, ഹൃദയമാണെന്നു സാഹിത്യകാരന്‍ പി. സുരേന്ദ്രന്‍. കൊടിഞ്ഞി കോറ്റത്തങ്ങാടിയില്‍ ഡി.സി.സി സംഘടിപ്പിച്ച ഏകദിന ഉപവാസത്തില്‍ സംസാരിക്കുകയായിരുന്നു അദ്ദേഹം.
അഹിംസയിലധിഷ്ഠിതമായ മഹാത്മാഗാന്ധിയുടെ പാരമ്പര്യമാണ് ഇന്ത്യയുടെ പാരമ്പര്യമെന്നും ഇന്ത്യയെ എത്ര വിഴുങ്ങാന്‍ ശ്രമിച്ചാലും ഗാന്ധിജിയുടെ ചര്‍ക്ക സ്വപ്നംകാണാന്‍പോലും മോദി വളര്‍ന്നിട്ടില്ലെന്നും അദ്ദേഹം പറഞ്ഞു. ഇന്ത്യന്‍ മതേതരത്വത്തിന്റെ ആത്മാവിനെ തകര്‍ക്കുക, ഇന്ത്യന്‍ ജനാധിപത്യത്തെ അട്ടിമറിക്കുക എന്നീ ലക്ഷ്യത്തോടെയാണ് സംഘ്പരിവാര്‍ മുന്നോട്ടുപോകുന്നത്. ഒരു കാലത്തും ഗാന്ധിജിയെ അംഗീകരിക്കാത്തവരാണ് ആര്‍.എസ്.എസുകാരെന്നും സുരേന്ദ്രന്‍ കൂട്ടിച്ചേര്‍ത്തു.
ശശികല ദേശീയഗാനത്തെ നിന്ദിച്ചിട്ടുണ്ട്. എന്നാല്‍, ശശികലയ്ക്ക് ഒരു നീതിയും കമലിന് മറ്റൊരു നീതിയുമെന്നത് അംഗീകരിക്കാനാകില്ല. ഇവിടെ ജനിച്ച കമലും എം.ടിയുമെല്ലാം ഈ മണ്ണില്‍തന്നെ ജീവിക്കുമെന്നും സുരേന്ദ്രന്‍ പറഞ്ഞു.