കണ്ണൂര്‍: പത്തു വര്‍ഷം പിന്നിട്ട ഡീസല്‍ വാഹനങ്ങള്‍ക്ക് ഹരിത ട്രൈബ്യൂണല്‍ ഏര്‍പ്പെടുത്തിയ വിലക്ക് കണ്ണൂരിലെ വാഹന പ്രേമികള്‍ക്കു തിരിച്ചടിയാകുന്നു. ചെറുവാഹനങ്ങള്‍ ബുക്ക് ചെയ്തവരും വാങ്ങിയവരും ഇതിനാല്‍ വെട്ടിലായി. വിധിക്കെതിരേ സംസ്ഥാന സര്‍ക്കാര്‍ അപ്പീല്‍ നല്‍കിയിട്ടുണ്ടെങ്കിലും വാഹന പ്രേമികളില്‍ ആശങ്ക നില നില്‍ക്കുകയാണ്. വാഹനങ്ങളുടെ ഡീലര്‍മാര്‍ക്കും സ്ഥാപനങ്ങള്‍ക്കും നിര്‍ദേശം ബാധിച്ചുതുടങ്ങി. പുതുതായി വാഹനം ബുക്കുചെയ്യുന്നവരുടെ എണ്ണത്തിലും കുറവുവന്നിട്ടുണ്ട്. പൊതുഗതാഗത, തദ്ദേശസ്ഥാപന വാഹനങ്ങളല്ലാതെ 2000 സി.സിക്കു മേലുള്ള പുതിയ ഡീസല്‍ വാഹനങ്ങള്‍ സര്‍ക്കാര്‍ രജിസ്റ്റര്‍ചെയ്തു നല്‍കരുതെന്നും നിര്‍ദേശത്തിലുണ്ട്. ഉത്തരവ് നടപ്പാക്കാന്‍ ഒരുമാസം മാത്രം കാലാവധി മാത്രമുള്ളതാണ് ആശങ്ക കൂടാന്‍ കാരണം.

സ്വകാര്യ ബസുകളെയും ലോറികളെയുമാണു പ്രധാനമായും ഉത്തരവ് പ്രതികൂലമായി ബാധിക്കുക. മറ്റുള്ളവരില്‍ നിന്നു പഴയ വാഹനം വാങ്ങിയവരിലും ആശങ്കയുളവാക്കിയിട്ടുണ്ട്. ഡല്‍ഹിയില്‍ നിരോധനം ഏര്‍പ്പെടുത്തിയതു കാരണം അവിടെനിന്നു ചുളുവിലയ്ക്ക് കണ്ണൂരിലേക്ക് ചെറുവാഹനങ്ങള്‍ എത്തിച്ചവരും കുറവല്ല.
കണ്ണൂര്‍ നഗരം കേന്ദ്രീകരിച്ച് മാത്രം 1500ഓളം സ്വകാര്യ ബസുകള്‍ സര്‍വിസ് നടത്തുന്നുണ്ട്. ഇവയില്‍ ആയിരത്തോളം ബസുകള്‍ ഉത്തരവുമൂലം നിരത്തിലിറക്കാന്‍ കഴിയാത്ത സ്ഥിതിയാവും. ഉത്തരവിനെതിരേ അപ്പീല്‍ സമര്‍പ്പിക്കാന്‍ ലോറി, ബസ് ഉടമകളുടെ സംയുക്തയോഗം നാളെ കൊച്ചിയില്‍ ചേരുമെന്നു ജില്ലാ ബസ് ഓപ്പറേറ്റേഴ്‌സ് ഓര്‍ഗനൈസേഷന്‍ പ്രസിഡന്റ് പി.കെ പവിത്രന്‍ പറഞ്ഞു. നിരവധി തൊഴിലാളികളെ നേരിട്ടുബാധിക്കുന്ന ഉത്തരവിനെതിരേ രംഗത്തു വരാനാണ് തൊഴിലാളികളുടെ തീരുമാനം. കെ.എസ്.ആര്‍.ടി.സിക്കും ഉത്തരവ് പാലിക്കേണ്ട സ്ഥിതിയായതോടെ പൊതുഗതാഗതത്തെ ഉത്തരവ് കൂടുതലായി ബാധിക്കും.