കണ്ണൂര്‍: സബ്ജില്ലയിലും ജില്ലയിലും അപ്പീലിലൂടെ വിജയതിലകം ചാര്‍ത്തിയ തേജയ്ക്ക് വീണ്ടും അപ്പീല്‍ തുണയായി. ഹൈസ്‌കൂള്‍ വിഭാഗം കേരള നടനത്തില്‍ ഒന്നാം സ്ഥാനം പങ്കുവെച്ച കണ്ണൂര്‍ സെന്റ് തെരേസാസ് സ്‌കൂളിലെ ഒമ്പതാം തരം വിദ്യാര്‍ഥിനി തേജ സുനിലിനെയാണ് അപ്പീല്‍ വീണ്ടും തുണച്ചത്.

സബ്ജില്ല മുതല്‍ അപ്പീലിലൂടെ മത്സരിച്ച തേജ സുനിലിന് സംസ്ഥാന കലോത്സവത്തിലും കേരള നടനത്തില്‍ ഒന്നാം സ്ഥാനം ലഭിച്ചത് അപ്പീലിലൂടെയാണ്. കേരളനടനം മത്സരത്തില്‍ കാസര്‍കോട് ജില്ലയിലെ കക്കാട് ഹയര്‍സെക്കന്‍ഡറി സ്‌കൂള്‍ വിദ്യാര്‍ഥിനി അഭിനയക്ക് ഒന്നാംസ്ഥാനം പ്രഖ്യപിച്ചതിന് ശേഷം തേജ ഹയര്‍ അപ്പീല്‍ കമ്മിറ്റിയെ സമീപിക്കുകയായിരുന്നു. കേരളനടന മത്സരത്തിലെ വീഡിയോ ദൃശ്യങ്ങള്‍ കണ്ട അപ്പീല്‍ കമ്മിറ്റി തേജക്ക് ഒന്നാംസ്ഥാനം പ്രഖ്യാപിക്കുകയായിരുന്നു.

സബ്ജില്ലയില്‍ കേരളനടനത്തിന് രണ്ടാം സ്ഥാനത്തേക്ക് പിന്‍തള്ളിയപ്പോഴാണ് തേജ ആദ്യം അപ്പീല്‍ നല്‍കിയത്. ജില്ലാതലത്തിലും രണ്ടാം സ്ഥാനത്തേക്ക് പിന്‍തള്ളപ്പെട്ടപ്പോള്‍ വീണ്ടും അപ്പീല്‍ നല്‍കി. ഒടുവില്‍ സംസ്ഥാന തലത്തിലും ഒന്നാംസ്ഥാനം ഉറപ്പിക്കാന്‍ തേജ സുനിലിന് അപ്പീല്‍ തന്നെ വേണ്ടിവന്നു. കലോത്സവത്തില്‍ ഏറ്റവും വാശിയേറിയ മത്സരങ്ങളില്‍ ഒന്നായിരുന്നു ഹൈസ്‌കൂള്‍ വിഭാഗം കേരള നടനം. ബാന്റ് മേളത്തില്‍ ഒന്നാംസ്ഥാനം നേടിയ ടീം അംഗമായ തേജയ്ക്ക് ഭരതനാട്യത്തില്‍ എ ഗ്രേഡുണ്ട്.