കൊച്ചി: ഉപഭോക്താക്കള്‍ക്ക് ലോകോത്തര സൗകര്യങ്ങളും പരാതിരഹിത സേവനങ്ങള്‍ ലഭ്യമാക്കുന്നതിനും, വിതരണകേന്ദ്രങ്ങളില്‍ പരമാവധി കൃത്യത പാലിക്കുന്നതിനും ഇന്ത്യന്‍ ഓയില്‍ കോര്‍പ്പറേഷന്‍ നൂതനസാങ്കേതികവിദ്യ ഉപയോഗിച്ചുള്ള സ്മാര്‍ട്ട് ടെര്‍മിനലുകളുടെ സാന്നിധ്യം ശക്തമാക്കും. സപ്ലൈ പോയിന്റുകളില്‍ ജീവനക്കാരെ കുറയ്ക്കുന്നതിനും കമ്പനിക്ക് ഇത് സഹായകമാണ്.
ഇന്ത്യന്‍ ഓയിലിന്റെ പ്രഥമ സ്മാര്‍ട്ട് ടെര്‍മിനല്‍ 2015 ഒക്‌ടോബറിലാണ് ആരംഭിച്ചത്. ഇതിനകം ഇന്ത്യന്‍ ഓയില്‍ 40 സ്മാര്‍ട്ട് ടെര്‍മിനലുകള്‍ സ്ഥാപിച്ചിട്ടുണ്ട്. ഇത്രയധികം സ്മാര്‍ട്ട് ടെര്‍മിനലുകള്‍ ഇന്ത്യയിലെ മറ്റൊരു എണ്ണക്കമ്പനിക്കുമില്ല. 2018 സാമ്പത്തിക വര്‍ഷാവസാനത്തോടെ ഇന്ത്യന്‍ ഓയിലിന്റെ എല്ലാ ടെര്‍മിനലുകളും സ്മാര്‍ട്ട് ടെര്‍മിനലുകളാക്കി മാറ്റുന്നതിനുള്ള പ്രവര്‍ത്തനങ്ങള്‍ പുരോഗമിക്കുകയാണെന്ന് ഐ.ഒ.സി വൃത്തങ്ങള്‍ അറിയിച്ചു.