പൈനാവ്: ലോകമൊട്ടാകെ വര്‍ഗീയ, തീവ്ര നിലപാടുകള്‍ക്ക് പ്രചാരം കിട്ടുന്ന പ്രവണത ഏറിവരികയാണെന്നും അത് നമ്മുടെ ജനാധിപത്യസംവിധാനത്തിന് കോട്ടമുണ്ടാക്കാതിരിക്കാന്‍ യുവതലമുറ കൂടുതല്‍ കര്‍ത്തവ്യബോധം കാട്ടണമെന്നും ജില്ലാ കലക്ടര്‍ ജി.ആര്‍ ഗോകുല്‍ പറഞ്ഞു. കലക്ട്രേറ്റില്‍ ദേശീയ സമ്മതിദാനാവകാശ ദിനാഘോഷം ഉദ്ാഘാടനം ചെയ്ത് സംസാരിക്കുകയായിരുന്നു അദ്ദേഹം.
നമ്മുടെ സമൂഹത്തില്‍ ഇപ്പോഴും നിലനില്‍ക്കുന്ന പലതരത്തിലുള്ള അസമത്വം ജനാധിപത്യസംവിധാനത്തിന് വെല്ലുവിളിയാണ്. തീവ്രനിലപാടുകളുടെ പ്രചാരണം ചെറുക്കാനും അസമത്വം ഇല്ലാതാക്കാനും വോട്ടവകാശത്തെ പ്രയോജനപ്പെടുത്താന്‍ അദ്ദേഹം യുവവോട്ടര്‍മാരോട് ആഹ്വാനം ചെയ്തു. പല മാധ്യമങ്ങളിലൂടെ ലഭിക്കുന്ന വിവരങ്ങളും അറിവുകളും വിവേചനബുദ്ധിയോടെ പരിശോധിച്ച് ശരി കണ്ടെത്തിവേണം വോട്ടവകാശം വിനിയോഗിക്കേണ്ടതെന്നും അദ്ദേഹം യുവതലമുറയെ ഓര്‍മിപ്പിച്ചു.
എല്ലാവര്‍ക്കും നന്മ ഉണ്ടായാലേ ലോകത്തും നന്മ ഉണ്ടാകൂ എന്നും തീവ്രനിലപാടുകള്‍ക്ക് അടിപ്പെട്ടാല്‍ ഏതാനും ചിലരിലേക്ക് മാത്രം നന്മ ചുരുക്കപ്പെടുമെന്നും അദ്ദേഹം പറഞ്ഞു. സമ്മതിദാനാഘോഷത്തോടനുബന്ധിച്ച് നടത്തിയ പെയിന്റിങ് മല്‍സരത്തില്‍ ഒന്നും രണ്ടും മൂന്നും സമ്മാനങ്ങള്‍ നേടിയ ജിയോ ജോര്‍ജ്, മിധുന്‍ വിന്‍സെന്റ്, അഭിനേഷ് സാബു എന്നിവര്‍ക്കുള്ള കാഷ് അവാര്‍ഡും സര്‍ട്ടിഫിക്കറ്റും ട്രോഫിയും കലക്ടര്‍ സമ്മാനിച്ചു. ജില്ലയിലെ തിരഞ്ഞെടുത്ത 25 യുവ വോട്ടര്‍മാര്‍ക്കുള്ള വോട്ടേഴ്‌സ് ഐ.ഡി കാര്‍ഡും ചടങ്ങില്‍ വിതരണം ചെയ്തു.
ഇലക്ഷന്‍ ഡെപ്യൂട്ടി കളക്ടര്‍ ടി.ജി സജീവ ്കുമാര്‍, ഡെപ്യൂട്ടി കലക്ടര്‍മാരായ പി.ജി രാധാകൃഷ്ണന്‍, ടി.ജി സഞ്ജയന്‍, സക്കീര്‍ ഹുസൈന്‍, ഫിനാന്‍സ് ഓഫീസര്‍ വി.കെ കമാലാസനന്‍, ഇടുക്കി തഹസില്‍ദാര്‍ സിറോഷ്.പി ജോണ്‍, ജൂനിയര്‍ സൂപ്രണ്ട് വിന്‍സന്റ് ജോസഫ്, സിബി തോമസ് തുടങ്ങിയവര്‍ സംസാരിച്ചു.