ന്യൂഡല്‍ഹി: റിയോ ഒളിംപിക്‌സില്‍ 74 കിലോ വിഭാഗം ഗുസ്തിയില്‍ സുശീല്‍ കുമാറിനേക്കാള്‍ മികച്ച മത്സരാര്‍ഥി നരസിങ് പഞ്ചം യാദവാണെന്ന് റെസ്‌ലിങ് ഫെഡറേഷന്‍ ഓഫ് ഇന്ത്യ. ഡല്‍ഹി ഹൈക്കോടതിയില്‍ നല്‍കിയ മറുപടിയിലാണ് ഇക്കാര്യം അറിയിച്ചത്. നേരത്തേ സുശീലും നരസിങും തമ്മിലുള്ള തര്‍ക്കത്തില്‍ അന്തിമതീരുമാനമെടുക്കാന്‍ ഡല്‍ഹി ഹൈക്കോടതി ആവശ്യപ്പെട്ടിരുന്നു.
നരസിങ് നേരത്തേതന്നെ യോഗ്യത നേടിയതാണ്. ഇക്കാരണത്താല്‍ സെലക്ഷന്‍ ട്രയല്‍സില്‍ നിന്ന് കഴിഞ്ഞ രണ്ടുവര്‍ഷത്തോളമായി നരസിങിനെതിരേ മത്സരിക്കുന്നതില്‍ നിന്ന് സുശീലിനെ ഒഴിവാക്കുകയായിരുന്നെന്ന് ഫെഡറേഷന്‍ പറഞ്ഞു. എന്നാല്‍ ഇതിനെ എതിര്‍ത്ത സുശീല്‍ ട്രയല്‍സിന് തനിക്ക് അവസരം ലഭിച്ചിരുന്നില്ലെന്നും ഇന്ത്യയെ പ്രതിനിധീകരിക്കുന്ന താന്‍ ഇക്കാലയളവില്‍ പ്രോ റെസ്‌ലിങ് ലീഗിലേക്ക് പോയിട്ടില്ലെന്നും വ്യക്തമാക്കി. എന്നാല്‍ റെസ്‌ലിങ് ഫെഡറേഷന്റെ വാദത്തിന് പ്രാമുഖ്യം നല്‍കുകയായിരുന്നു ഹൈക്കോടതി.