വാഷിങ്ടണ്‍: ഏഴ് മുസലിം രാജ്യങ്ങളില്‍ നിന്നുള്ള പൗരന്മാര്‍ക്ക് പ്രവേശനാനുമതി നിഷേധിച്ച നടപടിയെ എതിര്‍ത്ത ആക്ടിംഗ് അറ്റോര്‍ണി ജനറലിനെ യു.എസ് പ്രസിഡന്റ് ഡൊണാള്‍ഡ് ട്രംപ് പുറത്താക്കി. ട്രംപ് പുറപ്പെടുവിച്ച അഭയാര്‍ഥി നിയന്ത്രണ എക്‌സിക്യൂട്ടീവ് ഉത്തരവ് നടപ്പാക്കേണ്ടതില്ലെന്ന നിലപാട് സ്വീകരിച്ച ആക്ടിംഗ് അറ്റോര്‍ണി ജനറല്‍ സാലി യേറ്റ്‌സിനെയാണ് പുറത്താക്കിയതെന്ന് വൈറ്റ് ഹൗസ് വക്താവ് ട്വിറ്ററില്‍ അറിയിച്ചു.

യേറ്റ്‌സിന് പകരം ഡാനാ ബോയന്റെയെ തല്‍സ്ഥാനത്ത് നിയമിച്ചു. ഏഴു മുസ്ലിം രാഷ്ട്രങ്ങളില്‍ നിന്നുള്ളവര്‍ക്കും കുടിയേറ്റക്കാര്‍ക്കും പ്രവേശനം നിഷേധിച്ചത് നിയമാനുസൃതമല്ലെന്ന് യേറ്റ്‌സ് നിലപാട് എടുത്തിരുന്നു.

ട്രംപിന്റെ നടപടി യു.എസ് ഫെഡറല്‍ കോടതി കഴിഞ്ഞ ദിവസം ഭാഗികമായി സ്്‌റ്റേ ചെയ്തിരുന്നു. ലോകമെങ്ങുമുള്ള അഭയാര്‍ഥികള്‍ക്ക് 120 ദിവസത്തെ പ്രവേശിക്കുന്നതിനുള്ള വിലക്കാണ് ട്രംപ് സര്‍ക്കാര്‍ ഏര്‍പ്പെടുത്തിയത്. സിറിയയില്‍നിന്നുള്ള അഭയാര്‍ഥികളെ ഇനി ഉത്തരവുണ്ടാകുന്നതുവരെ വിലക്കി. ഇറാഖ്, സിറിയ, ഇറാന്‍, സുഡാന്‍, ലിബിയ, സൊമാലിയ, യെമന്‍ എന്നീ ഏഴ് മുസ്‌ലിം രാജ്യങ്ങളില്‍നിന്നുള്ളവരെ 90 ദിവസത്തേക്കും അമേരിക്കയില്‍ പ്രവേശിക്കുന്നതില്‍നിന്ന് വിലക്കിയിട്ടുണ്ട്