ശാസ്താംകോട്ട: എന്റെ നാട് ശുചിത്വനാട് കാമ്പയിന്റെ ഭാഗമായി മൈനാഗപ്പള്ളി പഞ്ചായത്ത് പ്ലാസ്റ്റിക് ശേഖരണം നടത്തി.
പരിസ്ഥിതി സംരക്ഷണത്തിന്റെ ഭാഗമായി ജനപങ്കാളിത്തത്തോടെ നടന്ന പ്ലാസ്റ്റിക് മാലിന്യ ശേഖരണം മറ്റ് പഞ്ചായത്തുകള്‍ക്ക് കൂടി മാതൃകയാവുകയാണ്. ഗ്രാമപഞ്ചായത്തംഗങ്ങളുടെ നേതൃത്വത്തില്‍ അങ്കണവാടി വര്‍ക്കര്‍മാര്‍, ആശാവര്‍ക്കര്‍മാര്‍, തൊഴിലുറപ്പ് തൊഴിലാളികള്‍, സന്നദ്ധ സംഘടനാ പ്രതിനിധികള്‍ സാംസ്‌കാരിക പ്രവര്‍ത്തകര്‍ എന്നിവരുടെ കൂട്ടായ്മയാണ് ഇന്നലെ രാവിലെ  രാവിലെ പഞ്ചായത്തിലെ വീടുകള്‍ തോറും കയറി പ്ലാസ്റ്റിക് മാലിന്യങ്ങള്‍ ശേഖരിച്ചത്. ഒരു ദിവസം കൊണ്ട് പഞ്ചായത്തിലെ മുഴുവന്‍ വാര്‍ഡുകളില്‍ നിന്നും പ്ലാസ്റ്റിക് ശേഖരിച്ചു. ഇരുന്നൂറിലധികം പേരാണ് ഇതിനായി രംഗത്തിറങ്ങിയത്.
പ്ലാസ്റ്റിക് മാലിന്യ് ശേഖരണത്തിന്റെ പഞ്ചായാത്ത്തല ഉദ്ഘാടനം പ്രസിഡന്റ് പി.എസ് ജയലക്ഷ്മി നിര്‍വ്വഹിച്ചു. ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ ശാന്തകുമാരി അധ്യക്ഷയായി.വാര്‍ഡുകളുടെ വിവിധ കേന്ദ്രങ്ങളില്‍ ശേഖരിച്ച പ്ലാസ്റ്റിക് ശേഖരം വേണാട് റീ സൈക്കിള്‍ യൂനിറ്റിലേക്ക് കൊണ്ടുപോയി. പഞ്ചായത്തിലെ എല്ലാ വാര്‍ഡുകളിലും നിന്നായി ആയിരത്തിലധികം ചാക്കുകളിലായാണ് മാലിന്യം ശേഖരിച്ചത്. ഇതുവഴി പഞ്ചായത്തിനെ പരിസ്ഥിതി സൗഹൃദഗ്രാമമാക്കുന്നതിന്റെ ആദ്യഘട്ടം പൂര്‍ത്തിയായതായും എല്ലാ മാസവും അദ്യവാരവും പ്ലാസ്റ്റിക് ശേഖരണവുമായി മുന്നോട്ട് പോകാനാണ് തീരുമാനമെന്നും പഞ്ചായത്ത് അധികൃതര്‍ അറിയിച്ചു.