ന്യൂഡല്‍ഹി: അഗസ്റ്റ വെസ്റ്റ്‌ലാന്‍ഡ് ഹെലികോപ്റ്റര്‍ ഇടപാടുമായി ബന്ധപ്പെട്ട് ഛത്തീസ്ഗഡ് സര്‍ക്കാരിനെതിരായി ഉയര്‍ന്ന അഴിമതിയാരോപണം അന്വേഷിക്കണമെന്ന ആവശ്യം സുപ്രിം കോടതി തള്ളി.
ആരോപണത്തില്‍ പ്രഥമദൃഷ്ട്യാ കഴമ്പില്ലെന്നു വ്യക്തമാക്കി ജസ്റ്റിസുമാരായ എ.കെ ഗോയല്‍, യു.യു ലളിത് എന്നിവരടങ്ങിയ രണ്ടംഗ ബെഞ്ചിന്റെതാണ് നടപടി. 2006- 07 കാലത്ത് അഗസ്ത വെസ്റ്റ്‌ലാന്റ് കമ്പനിയില്‍ നിന്നു രാഷ്ട്രപതി, പ്രധാനമന്ത്രി തുടങ്ങിയ വി.വി.ഐ.പികള്‍ക്കായി ഹെലികോപ്റ്റര്‍ വാങ്ങിയതില്‍ രമണ്‍സിങ്ങ് സര്‍ക്കാര്‍ അധിക തുക ചെലവഴിച്ചെന്നും ഈ തുക പിന്നീട് ബ്രിട്ടനിലെ കടലാസ് കമ്പനിയുടെ പേരില്‍ രമണ്‍സിങ്ങിന്റെ മകന്‍ അഭിഷേകിന്റെ അക്കൗണ്ടില്‍ എത്തിയെന്നുമായിരുന്നു ആരോപണം.
ഇക്കാര്യം എസ്.ഐ.ടി അന്വേഷിക്കണമെന്നാവശ്യപ്പെട്ട് സ്വരാജ് അഭിയാനു വേണ്ടി പ്രമുഖ അഭിഭാഷകന്‍ പ്രശാന്ത് ഭൂഷണ്‍ ആണ് സുപ്രിം കോടതിയെ സമീപിച്ചത്.
എന്നാല്‍ കേസ് എസ്.ഐ.ടിക്കു വിടാന്‍ മാത്രം ആരോപണത്തെ സാധൂകരിക്കുന്ന തെളിവുകള്‍ ഇല്ലെന്നു കോടതി നിരീക്ഷിച്ചു.