കോടഞ്ചേരി: രണ്ടേക്കര്‍ തരിശുനിലം പാട്ടത്തിനെടുത്ത് ജൈവ നെല്‍കൃഷി ചെയ്ത് കോടഞ്ചേരി പഞ്ചായത്തിലെ നൂറാംതോട് കൊച്ചുമാരിയില്‍ കൊച്ചുമുഹമ്മദും കുടുംബവും മാതൃകയാവുന്നു. പാലയ്ക്കല്‍ പരപ്പം പൊയിലില്‍ അസ്സീസ് മാസ്റ്ററുടെ രണ്ടേക്കര്‍ തരിശുനിലം പാട്ടത്തിനെടുത്താണ് കൊച്ചുമുഹമ്മദ് കൃഷിയിറക്കിയത്.
വയനാടന്‍ കാറ്റേറ്റ് പകലന്തിയോളം പണിയെടുത്താണ് നിലമൊരുക്കിയത്. കുമ്മായം, ചാരം, തേയിലച്ചണ്ടി, വേപ്പിന്‍പിണ്ണാക്ക് ,എല്ലുപൊടി എന്നിവ ഉപയോഗിച്ചാണ് നിലം സമ്പുഷ്ടമാക്കിയത്. 120 ദിവസം മൂപ്പുള്ള ജ്യോതികള്‍ച്ചര്‍ ഇനമാണ് ക്യഷിയിറക്കിയത്. മണ്ണിന്റെ മനസ്സറിഞ്ഞ് ചേറിലിറങ്ങി ക്യഷിയൊരുക്കാന്‍ കൊച്ചുമുഹമ്മദിന് കൂട്ടായി ഭാര്യ ജമീല മക്കളായ സജ്‌നാസ്, ജെറീഷ് മരുമക്കളായ ജംഷീന, നൗസീഹ അമ്മാവന്‍ അലിയാര്‍ എന്നിവരും ഒപ്പമുണ്ട്. കൊച്ചുമുഹമ്മദിന് പിന്തുണയുമായി കോടഞ്ചേരി ക്യഷിഭവനിലെ കൃഷി ഓഫിസര്‍ ഷബീര്‍ അഹമ്മദും ഒപ്പമുണ്ട്. നെല്‍ക്കൃഷി കൂടാതെ തരിശുനിലങ്ങള്‍ പാട്ടത്തിനെടുത്ത് കപ്പയും നേന്ത്രവാഴക്കൃഷിയും കൊച്ചുമുഹമ്മദിന്റേതായുണ്ട്.