ന്യൂഡല്‍ഹി: ബോളിവുഡ് താരം ശ്രീദേവിയുടെ മരണത്തില്‍ ചോദ്യങ്ങളുമായി ബി.ജെ.പി നേതാവ് സുബ്രഹ്മണ്യന്‍ സ്വാമി. മരണം സംബന്ധിച്ച് പ്രോസിക്യൂഷന്റെ വിശദീകരണത്തിനായി കാത്തിരിക്കാം. മാധ്യമങ്ങളില്‍ വരുന്ന വാര്‍ത്തകള്‍ക്ക് സ്ഥിരതയില്ലെന്നും അദ്ദേഹം പറഞ്ഞു.

ശ്രീദേവിയെ കൊലപ്പെടുത്തിയതാണെന്ന് അദ്ദേഹം ആരോപിച്ചു. ബോളിവുഡും അധോലോകവും തമ്മിലുള്ള ബന്ധമാണ് ശ്രീദേവിയുടെ കൊലപാതകത്തിന് പിന്നിലെന്ന് താന്‍ സംശയിക്കുന്നു. അധോലോക നായകന്‍ ദാവൂദ് ഇബ്രാഹിമും ബോളിവുഡ് നടിമാരും തമ്മിലുള്ള ബന്ധത്തെക്കുറിച്ച് അന്വേഷണം നടത്തേണ്ടതുണ്ടെന്നും സ്വാമി പറഞ്ഞു.

ശ്രീദേവി ഒരിക്കലും വീര്യമേറിയ മദ്യം കഴിച്ചിരുന്നില്ല. പിന്നെ എങ്ങനെയാണ് അവരുടെ ഉള്ളില്‍ മദ്യം എത്തിയത്. സി.സി.ടി.വി കാമറകള്‍ക്ക് എന്തു സംഭവിച്ചു. ഇതിനെക്കുറിച്ചൊന്നും ആരും പറഞ്ഞുകേള്‍ക്കുന്നില്ല. ഡോക്ടര്‍മാര്‍ വളരെപെട്ടെന്ന് മാധ്യമങ്ങള്‍ക്കു മുന്നില്‍ പ്രത്യക്ഷപ്പെട്ട് ശ്രീദേവി മരിച്ചത് ഹൃദയസ്തംഭനം മൂലമാണെന്ന് പറയുകയുമായിരുന്നു. ഇത് വ്യക്തമായ പദ്ധതിയോടെയായിരുന്നുവെന്നും സുബ്രഹ്മണ്യന്‍ സ്വാമി പറഞ്ഞു.