കോഴിക്കോട്: സമൂഹത്തെയും സമുദായത്തേയും കാലഘട്ടങ്ങളേയും ബന്ധിപ്പിക്കുന്നതാണ് കെ.പി രാമനുണ്ണിയുടെ ദൈവത്തിന്റെ പുസ്തകമെന്ന് എം.പി അബ്ദുസമദ് സമദാനി.
ബഹുസ്വരതയുടെ പാഠപുസ്തകവും മതേതരത്വത്തിന്റെ നിഘണ്ടുവുമായെന്നും ഈ കൃതി കാലാതിവര്‍ത്തിയായി നിലകൊള്ളുമെന്നും അദ്ദേഹം പറഞ്ഞു. സെക്കുലര്‍ ഫോറത്തിന്റെ ആഭിമുഖ്യത്തില്‍ കെ.പി കേശവമേനോന്‍ ഹാളില്‍ നടന്ന കെ.പി രാമനുണ്ണിയെ ആദരിക്കല്‍ ചടങ്ങില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം. ഡോ.എം.ജി.എസ് നാരായണന്‍ കെ.പി രാമനുണ്ണിയെ ആദരിച്ചു. ചടങ്ങ് കവി സച്ചിദാനന്ദന്‍ വിഡിയോ കോണ്‍ഫറന്‍സിലൂടെ ഉദ്ഘാടനം ചെയ്തു. വര്‍ഗീയശക്തികള്‍ കൊലപ്പെടുത്തിയ ജുനൈദിന്റെ കുടുംബത്തിന് അവാര്‍ഡ് തുക നല്‍കിയതിലൂടെ ഫാസിസത്തിനെതിരായ പ്രതീകാത്മക പ്രതിരോധമാണ് രാമനുണ്ണി നടത്തിയതെന്ന് സച്ചിദാനന്ദന്‍ പറഞ്ഞു. പി.കെ പാറക്കടവ് അധ്യക്ഷനായി. ടി.കെ ഹംസ, സി.കെ സുബൈര്‍, എ.കെ അബ്ദുല്‍ ഹക്കിം, വി.ടി സുരേഷ്, പ്രവീണ്‍ രത്‌നാകരന്‍ സംസാരിച്ചു. പുസ്തക സഹായികളെ ആദരിക്കുന്ന ചടങ്ങില്‍ ഡോ.ഖദീജ മുംതാസ് അധ്യക്ഷയായി. പ്രൊഫ. കെ. ഗോപാലന്‍കുട്ടി, പ്രൊഫ. കെ. ബാപ്പുട്ടി, പി.കെ പാറക്കടവ്, പി.എം നാരായണന്‍, പി.എം ഗോവിന്ദനുണ്ണി, വി.എ കബീര്‍, ഇല്യാസ് മൗലവി, എ.കെ അബ്ദുല്‍ മജീദ്, അഹമ്മദ്കുട്ടി ശിവപുരം, ഡോ.പി.കെ രാധാമണി, ശിഹാബുദ്ദീന്‍ ഇബ്‌നു ഹംസ, അബ്ബാസ് പനക്കല്‍, എ.കെ അസംഗന്‍, എസ്. കമല്‍നാഥ് എന്നിവരെ ടി.കെ ഹംസ പൊന്നാട അണിയിച്ചു.
രാവിലെ നടന്ന സെമിനാര്‍ ബി. രാജീവന്‍ ഉദ്ഘാടനം ചെയ്തു. മേയര്‍ തോട്ടത്തില്‍ രവീന്ദ്രന്‍ അധ്യക്ഷനായി. എം.സി അബ്ദുല്‍നാസര്‍, കെ.വി സജീവന്‍ പ്രബന്ധങ്ങള്‍ അവതരിപ്പിച്ചു. കമാല്‍ വരദൂര്‍, അനില്‍കുമാര്‍ തിരുവോത്ത്, ബി. അഞ്ജു സംസാരിച്ചു. ഉച്ചക്ക് ശേഷം നടന്ന സെഷനില്‍ ഡോ.പി സുരേഷ് അധ്യക്ഷനായി. കെ.എം അനില്‍, കെ.ടി കുഞ്ഞിക്കണ്ണന്‍ പ്രബന്ധം അവതരിപ്പിച്ചു. ഗുലാബ്ജാന്‍, കിരണ്‍ ഡാനിയല്‍ സംസാരിച്ചു.