ഏറ്റുമാനൂര്‍: തമിഴ്‌നാട്ടിലെ മധുരയ്ക്കടുത്ത് നടന്ന കൊലപാതക കേസിലെ രണ്ട് പ്രതികളെ ഏറ്റുമാനൂരില്‍ നിന്ന് തമിഴ്‌നാട് പൊലിസ് അറസ്റ്റ് ചെയ്തു. സുന്ദരപാണ്ഡ്യന്‍, രമേശന്‍ എന്നിവരെയാണ് മധുര ജില്ലയില്‍ സിന്ദുപെട്ടി സ്റ്റേഷന്‍ അതിര്‍ത്തിയില്‍ നടന്ന കൊലപാതകവുമായി ബന്ധപ്പെട്ട് അറസ്റ്റ് ചെയ്തത്. ഏറ്റുമാനൂര്‍ ക്ഷേത്രത്തിന് സമീപത്ത് നിന്നാണ് ഇന്നലെ രാവിലെ ആറരയോടെ ഇവരെ അറസ്റ്റ് ചെയ്തത്. ക്ഷേത്രത്തിന്റെ കിഴക്കേനടയില്‍ സുശീലാഭവനില്‍ നാരായണന്‍ നായരുടെ വീട്ടില്‍ വാടകയ്ക്ക് താമസിച്ചുവരികയാണ് രമേശന്‍. പലഹാര കച്ചവടം നടത്തിയാണ് ഇയാള്‍ ഇവിടെ കുടുംബസമേതം കഴിഞ്ഞിരുന്നത്.
2017 ലാണ് കേസിനാസ്പദമായ സംഭവം. മധുര സ്വദേശിയായ മണി എന്നയാളെ വധിച്ച ശേഷം മുങ്ങിയ രണ്ടാം പ്രതിയായ സുന്ദരപാണ്ഡ്യന്‍ കേസിലെ നാലാം പ്രതി കൂടിയായ രമേശനോടൊപ്പം ഏറ്റുമാനൂരിലെത്തി താമസിക്കുകയായിരുന്നു. കഴിഞ്ഞ അഞ്ച് വര്‍ഷമായി രമേശന്‍ ഏറ്റുമാനൂരാണ് താമസം.
നടപടികള്‍ പൂര്‍ത്തിയാക്കിയ ശേഷം ഇവരെ തമിഴ്‌നാട്ടിലേക്ക് കൊണ്ടുപോയി. സി.ഐ അന്നമയില്‍, എസ്.ഐ പാണ്ഡ്യരാജന്‍ എന്നിവരുടെ നേതൃത്വത്തിലുള്ള തമിഴ്‌നാട് പൊലിസ് സംഘമാണ് ഇവരെ അറസ്റ്റ് ചെയ്തത്.