തൊടുപുഴ: ജനാധിപത്യത്തിന്റെ സങ്കേതമായ ഭൂരിപക്ഷ അഭിപ്രായം അനുസരിക്കല്‍ എന്നതിനെ ദുരുപയോഗപ്പെടുത്തി ഇന്ത്യന്‍ ജനാധിപത്യത്തെ ഹൈജാക്ക് ചെയ്യുന്ന ആധുനിക കാലഘട്ടത്തിന്റെ ഭരണകൂട ഭീകരതയ്‌ക്കെതിരായി ജാഗ്രത പാലിക്കണമെന്ന് ജോയിന്റ് കൗണ്‍സില്‍ ജില്ലാ സമ്മേളനത്തിന്റെ ഭാഗമായുള്ള പൊതുസമ്മേളനം ആഹ്വാനം ചെയ്തു. തൊടുപുഴ മുനിസിപ്പല്‍ മൈതാനിയില്‍ സ്വാഗതസംഘം ചെയര്‍മാന്‍ പി.പി. ജോയിയുടെ അധ്യക്ഷതയില്‍ ചേര്‍ന്ന പൊതുസമ്മേളനം യുവകലാ സാഹിതി സംസ്ഥാന സെക്രട്ടറി എ.പി. അഹമ്മദ് ഉദ്ഘാടനം ചെയ്തു.
കിസാന്‍ സഭ സംസ്ഥാന സെക്രട്ടറി മാത്യു വര്‍ഗീസ്, ജോയിന്റ് കൗണ്‍സില്‍ സംസ്ഥാന ട്രഷറര്‍ എ. സുരേഷ്‌കുമാര്‍ എന്നിവര്‍ ആശംസകളര്‍പ്പിച്ച് സംസാരിച്ചു. സര്‍ക്കാര്‍ ജീവനക്കാരുടെ മക്കള്‍ക്കായി നടന്ന ക്വിസ്സ് മത്സര വിജയികള്‍ക്കുള്ള സമ്മാനവിതരണവും നടത്തി. ജില്ലാ സെക്രട്ടറി ഡി. ബിനില്‍ സ്വാഗതവും, സ്വാഗത സംഘം ജനറല്‍ കണ്‍വീനര്‍ ആര്‍. ബിജുമോന്‍ കൃതജ്ഞതയും രേഖപ്പെടുത്തി. പൊതുസമ്മേളന ശേഷം നന്മ സാംസ്‌കാരികവേദിയുടെ ആഭിമുഖ്യത്തില്‍ ജീവനക്കാരുടെ ഗാനമേളയും നടന്നു. ഇന്നു രാവിലെ 10 മുതല്‍ മുനിസിപ്പല്‍ ടൗണ്‍ഹാളില്‍ പ്രതിനിധി സമ്മേളനം നടക്കും.