കൊട്ടിയം: ഇത്തിക്കരയാറ്റില്‍ മരിച്ച നിലയില്‍ കണ്ട പെണ്‍കുട്ടിയെ അവസാനമായി പിന്‍തുടര്‍ന്നതെന്നു കരുതുന്ന യുവാവിനെ കുറിച്ച് പൊലിസിന് വ്യക്തമായ സൂചന ലഭിച്ചു. ഇയാള്‍ കസ്റ്റഡിയില്‍ ആയെന്ന് വിവരങ്ങള്‍ ഉണ്ടായിരുന്നെങ്കിലും പൊലിസ് ഇത് നിഷേധിച്ചു. പെട്രോള്‍ പമ്പില്‍ നിന്നും ലഭിച്ച സി.സ ിട.ിവി ദൃശ്യങ്ങളും ബൈക്കിന്റെ നമ്പരും കേന്ദ്രീകരിച്ചു നടത്തിയ അന്വേഷണത്തിലാണ് പെണ്‍കുട്ടിയെ അവസാനം ബൈക്കില്‍ പിന്‍തുടര്‍ന്ന് ഭീഷണിപ്പെടുത്തുകയും സ്‌കൂട്ടറിന്റെ ചാവി ഊരി കൊണ്ടു പോകുകയും ചെയ്ത യുവാവിനെ കുറിച്ച് പൊലിസിന് സൂചന ലഭിച്ചത്. അമ്പലംകുന്ന് സ്വദേശിയായ യുവാവ് ഒളിവിലാണന്ന് പൊലിസ് പറയുന്നു.
ബുധനാഴ്ച ഇയാള്‍ പല പ്രാവശ്യവും പെണ്‍കുട്ടി ജോലി ചെയ്യുന്ന ലാബില്‍ എത്തിയിരുന്നു. രാവിലെ എത്തി രക്ത പരിശോധനയും നടത്തി. ജോലി കഴിഞ്ഞിറങ്ങിയ പെണ്‍കുട്ടിയെ പിന്‍തുടര്‍ന്ന് ഇയാള്‍ ആറുമണിയോടെ സിത്താര മുക്കിലെ പെട്രോള്‍ പമ്പിലും എത്തിയിരുന്നു.
സ്‌ക്കൂട്ടറില്‍ ഇന്ധനം നിറയ്ക്കുന്നതിനിടെ ബൈക്കിലെത്തിയ ഇയാള്‍ യുവതിയെ ഭീഷണിപ്പെടുത്തുകയും സ്‌ക്കൂട്ടറിന്റെ ചാവി ഊരി കൊണ്ടു പോകുകയും ചെയ്തു.
യുവതി പിന്നാലെ സ്‌കൂട്ടറും ഉരുട്ടി പമ്പില്‍ നിന്നും പുറത്തേയ്ക്ക് പോയി. പിന്നീട് ഈ സ്‌ക്കൂട്ടര്‍ കാണുന്നത് വ്യാഴാഴ്ച രാവിലെ ഒന്‍പത് മണിയോടെ ഇത്തിക്കര പാലത്തിനടുത്ത് നിന്നാണ്.
രാവിലെ മുതല്‍ ഇത്തിക്കരയാറ്റിലും പരിസര പ്രദേശങ്ങളിലും തിരച്ചില്‍ നടത്തിയിരുന്ന പൊലിസോ, ബന്ധുക്കളൊ ഈ സ്‌ക്കൂട്ടര്‍ അവിടെ കണ്ടിരുന്നില്ല.
ഈ സമയം മറ്റാരോ സ്‌ക്കൂട്ടര്‍ അവിടെ കൊണ്ടു വച്ചിട്ട് പോയതായാണ് കരുതുന്നത്. ഇതും സംഭവത്തിന്റെ ദുരൂഹത ഏറെ വര്‍ധിപ്പിക്കുന്നു.
വിജിയുടെ സംസ്‌കാരം ഇന്നലെ ഉച്ചതിരിഞ്ഞ് മൂന്നു മണിയോടെ കല്ലുവാതുക്കല്‍ നല്ലിടയന്‍ ദേവാലയത്തില്‍ നടന്നു.