തിരുവനന്തപുരം: കോര്‍പറേഷന്‍ പരിധിയില്‍ സമ്പൂര്‍ണ പ്ലാസ്റ്റിക് നിരോധനം ഏര്‍പ്പെടുത്താന്‍ കഴിയുമെന്ന് മേയര്‍ വി.കെ പ്രശാന്ത്. ജനങ്ങള്‍ അതിന് പൂര്‍ണമായും തയാറാണെന്നാണ് തന്റെ അനുഭവമെന്നും മേയര്‍ പറഞ്ഞു.
ഹരിതകേരളം മിഷന്റെ ഭാഗമായി സര്‍ക്കാര്‍ ഓഫിസുകളില്‍ ഹരിതചട്ടം നടപ്പാക്കുന്നതിനായി ചുമതലയുള്ള നോഡല്‍ ഓഫിസര്‍മാരുടെ ജില്ലാതല പരിശീലനം പേരൂര്‍ക്കടയില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
ഹരിത നിയമാവലി പ്രായോഗികമാക്കാന്‍ ഏറ്റവും കൂടുതല്‍ പരിശ്രമിച്ചത് തിരുവനന്തപുരം കോര്‍പറേഷനാണ്. തിരുവനന്തപുരത്ത് നടന്ന ഇന്ത്യയും ന്യൂസ്‌ലാന്റും തമ്മിലുള്ള ക്രിക്കറ്റ് മത്സരത്തിലാണ് ഇ.പി.ആര്‍ (എക്സ്റ്റന്‍ഡഡ് പ്രൊഡ്യൂസേഴ്‌സ് റെസ്‌പോണ്‍സിബിലിറ്റി) സംവിധാനം നഗരസഭ ആദ്യം നടപ്പാക്കിയത്. മൈതാനത്ത് വിതരണം ചെയ്ത 35,000 ശീതളപാനീയ പ്ലാസ്റ്റിക് കുപ്പികള്‍ കോര്‍പറേഷനുമായി ചര്‍ച്ച നടത്തിയതിന്റെ അടിസ്ഥാനത്തില്‍ വിതരണം ചെയ്ത ആഗോള കമ്പനി തന്നെ തിരിച്ചെടുത്തു.
ഇത്തരം സംവിധാനം നമ്മുടെ സൂപ്പര്‍മാര്‍ക്കറ്റുകളില്‍ നടപ്പാക്കുന്നതിനുള്ള പ്രാരംഭപ്രവര്‍ത്തനങ്ങള്‍ തുടങ്ങി. നാഷണല്‍ ഗെയിംസിലും തുടര്‍ന്ന് എല്ലാ വര്‍ഷങ്ങളിലും ആറ്റുകാല്‍ പൊങ്കാലയിലും ഹരിതചട്ടം കര്‍ശനമായി നടപ്പാക്കിയതിന്റെ ഗുണഫലം കോര്‍പറേഷനും നഗരവാസികളും തിരിച്ചറിഞ്ഞതായും മേയര്‍ പറഞ്ഞു. പ്ലാസ്റ്റിക് സഞ്ചികള്‍ക്ക് പകരം പൂര്‍ണമായ തോതില്‍ തുണിസഞ്ചികള്‍ നല്‍കുന്ന സംവിധാനം കോര്‍പറേഷന്‍ ഉടന്‍ നടപ്പാക്കുമെന്നും മേയര്‍ പറഞ്ഞു.
ജില്ലാ ശുചിത്വമിഷന്‍ സംഘടിപ്പിച്ചിരിക്കുന്ന പരിശീലനപരിപാടിയില്‍ എ.ഡി.എം ജോണ്‍ വി. സാമുവല്‍ അധ്യക്ഷനായിരുന്നു. ജില്ലയിലെ വിവിധ വകുപ്പുകളിലെ ഉദ്യോഗസ്ഥരെയാണ് നോഡല്‍ ഓഫിസര്‍മാരായി നിയമിച്ചിരിക്കുന്നത്. രണ്ടു ദിവസങ്ങളില്‍ വിവിധ ഘട്ടങ്ങളായി നടക്കുന്ന പരിശീലന പരിപാടിയില്‍ അതത് രംഗത്തെ വിദഗ്ധരാണ് ക്ലാസുകള്‍ നയിക്കുന്നത്.