ന്യൂദല്‍ഹി: ഭാരത് ബന്ദിനെ തുടര്‍ന്ന ഫയല്‍ ചെയ്ത കേസുകള്‍ പിന്‍വലിച്ചില്ലെങ്കില്‍ രാജസ്ഥാനിലേയും മധ്യപ്രദേശിലേയും കോണ്‍ഗ്രസ് സര്‍ക്കാരുകള്‍ക്കുള്ള പിന്തുണയേക്കുറിച്ച് പുനരലോചന വേണ്ടിവരുമെന്ന മുന്നറിയിപ്പുമായി ബി.എസ്.പി അധ്യക്ഷ മായാവതി. ഏപ്രില്‍ രണ്ടിന് നടന്ന ഭാരത് ബന്ദിനെ തുടര്‍ന്ന് ഒരു തെറ്റും ചെയ്യാത്തവര്‍ക്കെതിരെ രജിസ്റ്റര്‍ ചെയ്ത കേസുകള്‍ പിന്‍വലിക്കണമെന്നാണ് മായാവതിയുടെ ആവശ്യം. രാജസ്ഥാനിലും മധ്യപ്രദേശിലും ബി.എസ്.പി പിന്തുണയോടെയാണ് കോണ്‍ഗ്രസ് ഭരിക്കുന്നത്. രാജസ്ഥാനില്‍ ബി.എസ്.പിയ്ക്ക് രണ്ട് സീറ്റും മധ്യപ്രദേശില്‍ ആറ് സീറ്റുമാണുള്ളത്.

'രാജസ്ഥാനിലും മധ്യപ്രദേശിലും പുതുതായി തെരഞ്ഞെടുക്കപ്പെട്ട സര്‍ക്കാരുകള്‍ ഏപ്രില്‍ രണ്ടിലെ ഭാരത് ബന്ദിനെതുടര്‍ന്ന് ചാര്‍ജ് ചെയ്ത കേസ് പിന്‍വലിക്കാന്‍ സത്വര നടപടി സ്വീകരിക്കണം. അല്ലാത്തപക്ഷം സര്‍ക്കാരിനെ പുറത്തുനിന്ന് പിന്തുണക്കുന്ന കാര്യത്തില്‍ പാര്‍ട്ടി പുനരാലോചന നടത്തും'- അവര്‍ പറഞ്ഞു.

രാഷ്ട്രീയ സ്വാധീനത്തിന്റെയും സാമുദായിക പരിഗണനയുടെയും പേരിലാണ് പലര്‍ക്കെതിരെയും യു.പിയിലേയും രാജസ്ഥാനിലേയും മധ്യപ്രദേശിലേയും ബി.ജെ.പി സര്‍ക്കാരുകള്‍ കുറ്റം ചുമത്തിയത്. ഇപ്പോള്‍ മധ്യപ്രദേശിലും രാജസ്ഥാനിലും കോണ്‍ഗ്രസ് ആണ് അധികാരത്തില്‍. അതുകൊണ്ട് ഈ കേസുകള്‍ എത്രയും പെട്ടെന്ന് പിന്‍വലിക്കണം-മായാവതി പ്രസ്താവനയില്‍ ആവശ്യപ്പെട്ടു. ബി.ജെ.പി സര്‍ക്കാരുകളെപ്പോലെ വാഗ്ദാനങ്ങളല്ല വേണ്ടതെന്നും പ്രവര്‍ത്തിച്ചു കാണിച്ചുകൊടുക്കണമെന്നും മായാവതി പറഞ്ഞു.

പിന്നാക്ക സംവരണ ഭേദഗതിയുമായി ബന്ധപ്പെട്ട് ദലിത് സംഘടനകള്‍ നടത്തിയ ഭാരതബന്ദിനെ കോണ്‍ഗ്രസും പിന്തുണച്ചിരുന്നു. മോദി സര്‍ക്കാരില്‍ നിന്നും തങ്ങളുടെ അവകാശങ്ങള്‍ പിടിച്ചു വാങ്ങാനായി തെരുവിലിറങ്ങുന്ന ദലിത് സഹോദരങ്ങള്‍ക്ക് അഭിവാദ്യമെന്ന് രാഹുല്‍ ഗാന്ധി ട്വീറ്റ് ചെയ്യുകയും ചെയ്തിരുന്നു.