കാബൂള്‍: യു.എസുമായി ഈ ആഴ്ച നടത്താനിരുന്ന സമാധാന ചര്‍ച്ച അഫ്ഗാന്‍ താലിബാന്‍ റദ്ദാക്കി. അജണ്ടയിലെ അഭിപ്രായ വ്യത്യാസത്തെ തുടര്‍ന്നാണ് ഖത്തറില്‍ ഇന്ന് നടത്താനിരുന്ന ചര്‍ച്ച റദ്ദാക്കിയതെന്ന് മുതിര്‍ന്ന താലിബാന്‍ അംഗം പറഞ്ഞു.
ചര്‍ച്ച നടത്തില്ലെന്നതില്‍ ഇരുവിഭാഗവും ധാരണയിലെത്തിയെന്ന് അദ്ദേഹം പറഞ്ഞു. അഫ്ഗാന്‍ സര്‍ക്കാരിന്റെ പ്രതിനിധികളില്ലാതെയുള്ള നാലാംഘട്ട സമാധാന ചര്‍ച്ചയ്ക്കായിരുന്നു ഇരു വിഭാഗങ്ങളും നേരത്തെ തീരുമാനിച്ചിരുന്നത്.
ചര്‍ച്ചയില്‍ സര്‍ക്കാര്‍ പ്രതിനിധികളെ പങ്കെടുപ്പിക്കണമെന്ന് താലിബാന്‍ നേതൃത്വത്തില്‍ യു.എസ് സമ്മര്‍ദം ചെലുത്തിയിരുന്നു. എന്നാല്‍ ഇത് അംഗീകരിക്കാന്‍ താലിബാന്‍ തയാറായില്ല. 17 വര്‍ഷമായി അഫ്ഗാനില്‍ തുടരുന്ന യുദ്ധങ്ങളില്‍ തങ്ങളുടെ മുഖ്യ എതിരാളി യു.എസാണെന്നും അഫ്ഗാന്‍ സര്‍ക്കാര്‍ കേവലം പാവയാണെന്നുമാണ് താലിബാന്‍ വാദം.
യു.എസ് പ്രത്യേക പ്രതിനിധി സാല്‍മെ ഖലീല്‍സാദുമായി താലിബാന്‍ നേതൃത്വം മൂന്നു തവണ നേരത്തെ ചര്‍ച്ച നടത്തിയിട്ടുണ്ട്. ഡിസംബറില്‍ നടന്ന അവസാനഘട്ട ചര്‍ച്ചയില്‍ സഊദി അറേബ്യ, പാകിസ്താന്‍, യു.എ.ഇ എന്നിവയും പങ്കെടുത്തിരുന്നു.
2001 മുതലാണ് അഫ്ഗാനില്‍ യു.എസ് അധിനിവേശം ആരംഭിച്ചത്.
അധികാരത്തില്‍നിന്ന് താലിബാനെ പുറത്താക്കിയതിനു ശേഷം ഒരു ലക്ഷത്തോളം സൈന്യത്തെ യു.എസ് അഫ്ഗാനില്‍ നിയോഗിച്ചിരുന്നു.
എന്നാല്‍ 2014ല്‍ ഭൂരിപക്ഷം സൈന്യത്തെയും പിന്‍വലിച്ചു. 14000 സൈനികരാണ് നിലവില്‍ അഫ്ഗാനിലുള്ളത്.