പാരിസ്: സൂപ്പര്‍ താരം നെയ്മറിന് വിലയിട്ട് പി.എസ്.ജി. 2017ല്‍ താരത്തിനായി ചിലവിട്ട റെക്കോര്‍ഡ് തുക വെട്ടിക്കുറച്ചാണ് ഇത്തവണ പി.എസ്.ജി നെയ്മറെ ട്രാന്‍സ്ഫര്‍ ജാലകത്തില്‍ കൊണ്ടെത്തിച്ചതെന്ന് ടീം സ്‌പോര്‍ട്ടിങ് ഡയരക്ടര്‍ ലിയനാര്‍ഡോ അരൗജോ പറഞ്ഞു.
നിലവില്‍ 150 മില്ല്യന്‍ പൗണ്ടിനാണ് (ഏകദേശം 1234 കോടി ഇന്ത്യന്‍ രൂപ) താരത്തെ വില്‍ക്കാനായി പി.എസ്.ജി തയാറായത്. 2017ല്‍ 222 മില്യന്‍ പൗണ്ടിനായിരുന്നു (2014 കോടി ഇന്ത്യന്‍ രൂപ) പി.എസ്.ജി ബാഴ്‌സയില്‍ നിന്നും താരത്തെ സ്വന്തമാക്കിയത്. അടുത്ത സീസണോടെ താരം കൂടുമാറ്റ ജാലകത്തില്‍ ലഭ്യമാകും.
സീസണില്‍ ഒട്ടുമിക്ക മത്സരങ്ങളില്‍ നിന്നും താരം പരുക്കു മൂലം വിട്ടുനിന്നതാണ് ടീമധികൃതരെ ചൊടിപ്പിച്ചത്.
ബാഴ്‌സയെ ലക്ഷ്യമിട്ടാണ് പി.എസ്.ജി നെയ്മറെ ഒഴിവാക്കാനൊരുങ്ങുന്നത്. ഇതില്‍ താല്‍പര്യം പ്രകടിപ്പിച്ച് ബാഴ്‌സ നേരത്തേ പി.എസ്.ജിയെ സമീപിച്ചിരുന്നു. അതേസമയം, മറ്റൊരു മുന്നേറ്റതാരം കൈലിയന്‍ എംബാപ്പെയെ നിലവില്‍ വില്‍ക്കാന്‍ തങ്ങള്‍ ഒരുക്കമല്ലെന്ന് ടീമധികൃതര്‍ വ്യക്തമാക്കി.