ഇദ്‌ലിബ്: സിറിയയില്‍ വിമത നിയന്ത്രണത്തിലുള്ള ഇദ്‌ലിബ് പ്രവിശ്യയ്ക്കടുത്ത് വീണ്ടും വ്യോമാക്രമണം. കഴിഞ്ഞ ദിവസം നടന്ന റോക്കറ്റ് ആക്രമണത്തില്‍ രണ്ടു തുര്‍ക്കി സൈനികര്‍ കൊല്ലപ്പെട്ടു. ഇതോടെ മേഖലയില്‍ വീണ്ടും സംഘര്‍ഷാവസ്ഥ ഉടലെടുത്തിരിക്കുകയാണ്.

ആക്രമണത്തില്‍ തങ്ങളുടെ രണ്ടു സൈനികര്‍ കൊല്ലപ്പെട്ട വിവരം തുര്‍ക്കിയാണ് സ്ഥിരീകരിച്ചത്. കഴിഞ്ഞ ദിവസം നടന്ന ആക്രമണത്തില്‍ ചില സൈനികര്‍ക്കു പരുക്കേറ്റിട്ടുമുണ്ട്. സിറിയന്‍ അതിര്‍ത്തിയില്‍ കാവല്‍ നില്‍ക്കുന്ന തുര്‍ക്കി സൈനികര്‍ക്കെതിരേ മുന്‍പും ആക്രമണങ്ങള്‍ നടന്നിരുന്നു. ഇതില്‍ ഒട്ടേറെ സൈനികര്‍ കൊല്ലപ്പെടുകയും ചെയ്തിരുന്നു.

ഇതോടെ, തങ്ങള്‍ തിരിച്ചടിക്കുമെന്നു വ്യക്തമാക്കിയ തുര്‍ക്കി, സിറിയന്‍ സര്‍ക്കാരിനും അവരെ പിന്തുണയ്ക്കുന്ന റഷ്യയ്ക്കും അന്ത്യശാസനം നല്‍കുകയും ചിലയിടങ്ങളില്‍ ആക്രമണം നടത്തുകയും ചെയ്തിരുന്നു. ഇതിനു പിന്നാലെ റഷ്യ ചര്‍ച്ചയ്ക്കു തയാറാകുകയും തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാനും റഷ്യന്‍ പ്രസിഡന്റ് വ്‌ളാദ്മിര്‍ പുടിനും തമ്മില്‍ കൂടിക്കാഴ്ച നടത്തുകയും ചെയ്തിരുന്നു. ഇരു രാജ്യങ്ങളും തമ്മില്‍ സമാധാന കരാര്‍ ഒപ്പിട്ടിരിക്കേയാണ് വീണ്ടും ആക്രമണം നടന്നിരിക്കുന്നത്.