പെരിന്തല്‍മണ്ണ: വിവാഹ വാഗ്ദാനം നല്‍കി തട്ടിപ്പ് നടത്തിയ കേസില്‍ പ്രതിയുടെ കുറ്റസമ്മതം മറ്റു കേസുകളിലേക്ക് വഴി തുറക്കുന്നു. മോഷണക്കേസില്‍ അറസിലായ പുതിയാപ്ല മജീദ് എന്ന മജീദാണ് വിവിധ കേസുകളില്‍ കുറ്റസമ്മതം നടത്തിയത്. വിവാഹ വാഗ്ദാനം നല്‍കി ഫോണിലൂടെ പരിചയപ്പെട്ട് സ്ത്രീകളെ ടൗണിലേക്ക് വിളിച്ചു വരുത്തി ബാഗിലുള്ള സ്വര്‍ണവും പണവും കവരുകയാണ് ഇയാളുടെ രീതി. ഇതേ രീതിയില്‍ മങ്കട സ്വദേശിനിയുടെ സ്വര്‍ണം കവര്‍ന്നതിനെ തുടര്‍ന്ന് അറസ്റ്റിലായിരുന്നു. ചോദ്യം ചെയ്യലിനെ തുടര്‍ന്ന് പ്രതി മറ്റു കവര്‍ച്ചകളെ കുറിച്ച് വെളിപ്പെടുത്തുകയായിരുന്നു.
കായംകുളം സിനി ആശുപത്രിക്കടുത്ത് വച്ച് ഒരു യുവതിയുടെ മൂന്ന് പവന്‍ സ്വര്‍ണാഭരണവും പാരിപ്പള്ളി ജങ്ഷനില്‍വച്ച് ഒന്നര പവനോളം സ്വര്‍ണാഭരണവും കോട്ടയം കെ.എസ്.ആര്‍.ടി.സി ബസ് സ്റ്റാന്‍ഡിനു സമീപം ഒരു യുവതിയുടെ ഒന്‍പത് പവനും ഇരുപതിനായിരം രൂപയും കവര്‍ച്ച നടത്തിയതായി ഇദ്ദേഹം മൊഴി നല്‍കി. ഇദ്ദേഹത്തെ പെരിന്തല്‍മണ്ണ ജുഡീഷ്യല്‍ ഫസ്റ്റ് ക്ലാസ് കോടതിയില്‍ ഹാജരാക്കി റിമാന്‍ഡ് ചെയ്തു. പെരിന്തല്‍മണ്ണ  ഡി.വൈ.എസ്.പി സുരേഷ് കുമാറിന്റെ നേതൃത്വത്തില്‍ സി.ഐ സാജു കെ. എബ്രഹാം, എസ്.ഐ പ്രമോദ്, പ്രത്യേക അന്വേഷണ സംഘത്തിലെ എ.എസ്.ഐ പി.മോഹന്‍ദാസ്, സി.പി മുരളീധരന്‍, പി.എന്‍ മോഹന കൃഷ്ണന്‍, അസൈനാര്‍, എന്‍.ടി കൃഷ്ണകുമാര്‍, എന്‍.മനോജ് കുമാര്‍, ഷബീര്‍, സനോജ്, ദിനേശ്, ക്രിസ്റ്റിന്‍ ആന്റണി, ടി.സലീന എന്നിവരാണ് സംഘത്തിലുണ്ടായിരുന്നത്.