കാസർകോട്: കാസർകോട് ഉപ്പളയിൽ നിയന്ത്രണം വിട്ട കാർ ഡിവൈഡറിലിടിച്ച് ഉണ്ടായ അപകടത്തിൽ മൂന്ന് പേർ മരിച്ചു. ബേക്കൂർ സ്വദേശി കൃഷ്ണകുമാർ, ബായിക്കട്ട സ്വദേശി വരുൺ, മംഗലാപുരം സ്വദേശി കിഷുൻ എന്നിവരാണ് അപകടത്തിൽ മരിച്ചത്. ഇവർ മംഗലാപുരത്തേക്ക് പോകുമ്പോഴാണ് ദാരുണ സംഭവം നടന്നത്.

രാത്രി പത്തരയോടെ ഉപ്പള ചെക്ക്‌പോസ്റ്റിന് സമീപം പാലത്തിന്റെ കൈവരിയിലേക്ക് കാർ ഇടിച്ചു കയറി. 50 മീറ്ററോളം കൈവരി ഇടിച്ചു തകർത്ത ശേഷം വാഹനം മുന്നോട്ട് നീങ്ങുകയായിരുന്നു. അപകടത്തെ തുടർന്ന് റോഡിൽ കാറിന്റെ ഭാഗങ്ങൾ ചിതറിക്കിടക്കുകയായിരുന്നു.

തീവ്ര ആഘാതത്തിൽ മൂന്നു പേരും കാറിൽ നിന്ന് പുറത്തേക്ക് തെറിച്ച് വീണ നിലയിലായിരുന്നു. ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ ഗുരുതരമായി പരുക്കേറ്റ ഉപ്പിനങ്ങാടി സ്വദേശി രത്തനെ ആശുപത്രിയിൽ പ്രവേശിപ്പിച്ചിരിക്കുകയാണ്.
ഡ്രൈവർ ഉറങ്ങിപ്പോയതാകാമെന്നതാണ് പ്രാഥമിക നിഗമനം. പൊലീസ് സംഭവസ്ഥലത്ത് എത്തി കൂടുതൽ അന്വേഷണം ആരംഭിച്ചിട്ടുണ്ട്.