തിരുവനന്തപുരം: നരേന്ദ്രമോദി സര്‍ക്കാരിന്റെ നാലാം വാര്‍ഷികത്തില്‍ കോണ്‍ഗ്രസ് വഞ്ചനാദിനം ആചരിക്കുന്നതിന്റെ ഭാഗമായി കെ.പി.സി.സിയുടെ നേതൃത്വത്തില്‍ രാജ്ഭവനിലേക്ക് മാര്‍ച്ച് നടത്തി. കെ.പി.സി.സി പ്രസിഡന്റ് എം.എം ഹസന്‍ മാര്‍ച്ച് ഉദ്ഘാടനം ചെയ്തു.
ജനങ്ങളെ ഭിന്നിപ്പിച്ചു ഭരണം നടത്തുന്ന ബി.ജെ.പിയുടെ പേര് ബ്രിട്ടീഷ് ജനതാ പാര്‍ട്ടിയെന്നാക്കണമെന്ന് മാര്‍ച്ച് ഉദ്ഘാടനം ചെയ്തുകൊണ്ട് അദ്ദേഹം പറഞ്ഞു. ബ്രിട്ടീഷുകാരുടെ പ്രേതബാധയേറ്റപോലെയാണ് മോദിയുടെ ഭരണം. നാലുവര്‍ഷത്തെ ഭരണം ജനങ്ങള്‍ക്ക് ദുര്‍ദിനങ്ങളാണ് സമ്മാനിച്ചത്. അച്ഛാദിന്‍ രാജ്യത്തെ കോര്‍പറേറ്റുകള്‍ക്ക് മാത്രമാണ്. ഇന്ധവില വര്‍ധനവിന്റെ മറവില്‍ കോര്‍പറേറ്റുകള്‍ കോടികള്‍ കൊയ്യുന്നു. നികുതിയുടെ പേരില്‍ കൊള്ള നടത്തുന്നു.
ജി.എസ്.ടിയും നോട്ട് നിരോധനവും ഇന്ത്യന്‍ സമ്പദ്‌വ്യവസ്ഥയുടെ നട്ടെല്ല് തകര്‍ത്തു. വിലക്കയറ്റത്തില്‍ ജനങ്ങള്‍ വലയുന്നു. ഫാസിസ്റ്റ് ഭരണശൈലിയാണ് മോദിയുടേത്. സംഘ്പരിവാര്‍ ഭക്ഷണത്തിന്റെ പേരില്‍ ആളെ കൊല്ലുകയും ദലിതരെയും ന്യൂനപക്ഷങ്ങളെയും വേട്ടയാടുകയും ചെയ്യുകയാണെന്നും അദ്ദേഹം പറഞ്ഞു.
തമ്പാനൂര്‍ രവി, ശൂരനാട് രാജശേഖരന്‍, പാലോട് രവി, വര്‍ക്കല കഹാര്‍, രാജ്‌മോഹന്‍ ഉണ്ണിത്താന്‍ പി.എ സലീം, മണക്കാട് സുരേഷ്, നെയ്യാറ്റിന്‍കര സനല്‍, ചെയര്‍മാന്‍ സോളമന്‍ അലക്‌സ് തുടങ്ങിയവര്‍ പങ്കെടുത്തു.
ജില്ലകളില്‍ ഡി.സി.സികളുടെ ആഭിമുഖ്യത്തില്‍ കേന്ദ്രസര്‍ക്കാര്‍ സ്ഥാപനങ്ങളുടെ മുന്നില്‍ പ്രതിഷേധ കൂട്ടായ്മ സംഘടിപ്പിച്ചു.
നിപാ വൈറസ് ബാധ കണക്കിലെടുത്ത്് കോഴിക്കോട്ടും മലപ്പുറത്തും ചെങ്ങന്നൂര്‍ ഉപതെരഞ്ഞെടുപ്പ് നടക്കുന്ന ആലപ്പുഴ ജില്ലയിലും പ്രതിഷേധകൂട്ടായ്മ നടന്നില്ല. വയനാട്ടില്‍ മെയ് 29ന് പ്രതിഷേധകൂട്ടായ്മ സംഘടിപ്പിക്കും.