റിയാദ്: സഊദിയിൽ കൊവിഡ്-19 വൈറസ് ബാധിച്ച് അഞ്ചു പേർ കൂടി മരണപ്പെട്ടു. ഇതോടെ രാജ്യത്തെ മരണസംഖ്യ 21 ആയി ഉയർന്നു. ഇന്ന് പുതുതായി 165  കേസുകൾ കൂടി സ്ഥിരീകരിച്ചിട്ടുണ്ട്. ഇന്ന് മരണപ്പെട്ടവരിൽ മൂന്ന് പേർ വിദേശികളാണ്. മദീനയില്‍ രണ്ടു വിദേശികളും ഒരു സ്വദേശിയും ദമാമില്‍ ഒരു വിദേശിയും ഖമീസ് മുശൈത്തില്‍ ഒരു സ്വദേശിയുമാണ് മരിച്ചത്. ഇതോടെ ആകെ മരിച്ചവരുടെ എണ്ണം 21 ഉം രോഗം ബാധിച്ചവരുടെ എണ്ണം 1885 മായി ഉയര്‍ന്നു. ഇന്ന് 64 പേര്‍ക്ക് ഭേദമായതോടെ രോഗമുക്തി നേടിയവരുടെ എണ്ണം 428 ആയി ഉയർന്നിട്ടുണ്ട്. 

       വിദേശത്ത് നിന്നെത്തിയ  2 പേര്‍ക്കും സാമൂഹിക സമ്പര്‍ക്കം വഴി 163 പേര്‍ക്കുമാണ് പുതുതായി സ്ഥിരീകരിച്ചത്. മക്ക 48, മദീന 46, ജിദ്ദ 30, ഖഫ്ജി 9, റിയാദ് 9, ഖമീസ് മുശൈത്ത് 6, ഖത്തീഫ് 6, ദമാം 4, ദഹ്‌റാന്‍ 4, അബഹ് 2, റാസുതന്നൂറ, ബീശ, അഹദ്‌റുഫൈദ 1 എന്നിങ്ങനെയാണ് ഇന്ന് സ്ഥിരീകരിച്ച കേസുകൾ. നിലവിൽ മക്കയിലാണ് മറ്റെല്ലാ പ്രവിശ്യകളേക്കാളും രോഗികള്‍ കൂടുതലുള്ളത്. മൊത്തം 725  പേര്‍ക്കാണ് ഇവിടെ റിപ്പോര്‍ട്ട് ചെയ്തത്. റിയാദിൽ 626 വൈറസ് ബാധിതരുമുണ്ട്.  

      അതേസമയം, വൈറസ് വ്യാപനം തടയുന്നതിന്റെ ഭാഗമായി  മക്കയിലും മദീനയിലും 24 മണിക്കൂര്‍ കര്‍ഫ്യൂ ഏര്‍പ്പെടുത്തിയിട്ടുണ്ട്. ഇതോടെ ഇനി മുതല്‍ അടുത്ത അറിയിപ്പുണ്ടാകുന്നത് വരെ ആര്‍ക്കും മദീനയിലേക്കും മക്കയിലേക്കും പോകാനോ തിരിച്ചുവരാനോ സാധിക്കില്ല.