ലക്‌നൗ: ശക്തമായ പൊടിക്കാറ്റിലും മിന്നലിലും ഉത്തര്‍പ്രദേശില്‍ 26 മരണം. മഴയെ തുടര്‍ന്നുണ്ടായ അപകടങ്ങളില്‍ മഹാരാഷ്ട്രയില്‍ രണ്ടുപേരും മരിച്ചു. പഞ്ചാബിലും ഹരിയാനയിലും പേമാരി കനത്ത നാശനഷ്ടങ്ങള്‍ വിതച്ചു. ഡല്‍ഹിയില്‍ പൊടിക്കാറ്റും ശക്തമാണ്. മുംബൈയിലുണ്ടായ ശക്തമായ മഴയില്‍ റെയില്‍, വ്യോമഗതാഗതം തടസപ്പെട്ടു.
ഉത്തര്‍പ്രദേശിലെ 11 ജില്ലകളിലാണു ശക്തമായ പൊടിക്കാറ്റും മിന്നലും മഴയും റിപ്പോര്‍ട്ട് ചെയ്യപ്പെട്ടത്. ജോന്‍പൂര്‍, സുല്‍ത്താന്‍പൂര്‍ എന്നിവിടങ്ങളില്‍ അഞ്ചുപേര്‍ വീതവും ഉന്നാവോയില്‍ നാലുപേരും ചാന്ദൗലി, ബഹ്‌റായ്ച്ച് എന്നിവിടങ്ങളില്‍ മൂന്നുപേര്‍ വീതവും റായ്ബറേലിയില്‍ രണ്ടുപേരും മിര്‍സാപൂര്‍, സിതാപൂര്‍, അമേത്തി, പ്രതാപ്ഗഡ് എന്നിവിടങ്ങളില്‍ ഓരോ പേര്‍ വീതവും മരിച്ചു.
അപകടത്തില്‍ കൊല്ലപ്പെട്ടവരുടെ കുടുംബങ്ങള്‍ക്കും പരുക്കേറ്റവര്‍ക്കും ഉടന്‍ നഷ്ടപരിഹാരം നല്‍കാന്‍ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് ജില്ലാ ഭരണകൂടങ്ങളോട് ഉത്തരവിട്ടിട്ടുണ്ട്.