ന്യൂഡല്‍ഹി: ഏഴ് സംസ്ഥാനങ്ങളില്‍ തുടരുന്ന കര്‍ഷകപ്രക്ഷോഭത്തിന്റെ അവസാന ദിനമായ ഇന്ന് ഭാരതബന്ദ്. 12 കര്‍ഷക സംഘടനകളാണ് സമരത്തിലുള്ളത്. ജൂണ്‍ ഒന്നു മുതല്‍ തുടങ്ങിയ സമരത്തിന്റെ സമാപനമായിട്ടാണ് ഇന്ന് ബന്ദ് നടത്തുന്നത്.
തങ്ങളുടെ ന്യായമായ ആവശ്യങ്ങള്‍ പരിഗണിക്കാത്ത കേന്ദ്ര സംസ്ഥാന സര്‍ക്കാരുകള്‍ക്കെതിരേ സമരം ശക്തമാക്കുമെന്ന് നേതാക്കള്‍ മുന്നറിയിപ്പുനല്‍കി. കര്‍ഷകസമരത്തിന് പിന്തുണയുമായി ബി.ജെ.പി വിമതനേതാക്കളായ മുന്‍ കേന്ദ്രമന്ത്രി യശ്വന്ത് സിന്‍ഹ, ശത്രുഘ്‌നന്‍ സിന്‍ഹ എം.പി, വി.എച്ച്.പി മുന്‍ ജനറല്‍ സെക്രട്ടറി പ്രവീണ്‍ തൊഗാഡിയ എന്നിവരും രംഗത്തെത്തിയിരുന്നു.
കിസാന്‍ മഹാസംഘ് ആഹ്വാനം ചെയ്തിരിക്കുന്ന ഭാരത് ബന്ദ് സംസ്ഥാനത്ത് ഉണ്ടാകില്ല. പകരം കരിദിനം ആചരിക്കാന്‍ കിസാന്‍ മഹാസംഘിന്റെ സംസ്ഥാന ഘടകം തീരുമാനിച്ചു. കിസാന്‍ മഹാസംഘിന്റെ നേതൃത്വത്തില്‍ 105 സ്വതന്ത്ര കര്‍ഷക സംഘടനകളാണ് ഭാരത് ബബന്ദിന് ആഹ്വാനം ചെയ്തിരിക്കുന്നത്.
സംസ്ഥാനത്ത് ഹര്‍ത്താല്‍ ആചരിക്കുന്നത് സംബന്ധിച്ച് വ്യാപാരി വ്യവസായി ഏകോപന സമിതി നേതാക്കളുമായി മഹാസംഘ് ഭാരവാഹികള്‍ ചര്‍ച്ച നടത്തിയിരുന്നു. എന്നാല്‍ ഇപ്പോള്‍ സഹകരിക്കാനാകില്ലെന്ന് അവര്‍ അറിയിക്കുകയായിരുന്നു. തുടര്‍ന്നാണ് കരിദിനം ആചരിക്കാന്‍ തീരുമാനിച്ചത്. ജില്ലാ കേന്ദ്രങ്ങളില്‍ പ്രതിഷേധ പ്രകടനവും ധര്‍ണയും നടത്തും.
സമര നേതാക്കള്‍ കഴിഞ്ഞ ദിവസം ഗവര്‍ണര്‍ പി. സദാശിവത്തെ കണ്ട് രാഷ്ട്രപതിക്കുള്ള നിവേദനം നല്‍കിയിരുന്നു. കര്‍ഷകദ്രോഹ നയങ്ങളില്‍ നിന്ന് കേന്ദ്ര സര്‍ക്കാര്‍ പിന്‍വാങ്ങണമെന്നും കര്‍ഷക സംഘടനകളുടെ ആവശ്യം പരിഗണിക്കാന്‍ നേതാക്കളെ ചര്‍ച്ചക്കു വിളിക്കണമെന്നുമാണ് പ്രധാന ആവശ്യം.