മക്ക: കൊവിഡ്-19 വ്യാപന പശ്ചാത്തലത്തില്‍ മക്കയിലെ മസ്ജിദുല്‍ ഹറാമിലും മദീനയിലെ മസ്ജിദുന്നബവിയിലും തറാവീഹ് നിസ്‌കാരത്തിനു നിയന്ത്രണം ഏര്‍പ്പെടുത്തിയതോടൊപ്പം ഇഅ്തികാഫിനും വിലക്ക് ഏര്‍പ്പെടുത്തി. ഇരു ഹറം കാര്യ വകുപ്പാണ് ഇക്കാര്യം അറിയിച്ചത്. 

റമദാനില്‍ ഇരു ഹറമുകളിലും അഞ്ചു നേരത്തെ നിര്‍ബന്ധ നിസ്‌കാരങ്ങളിലും തറാവീഹ് നിസ്‌കാരത്തിലും പങ്കെടുക്കുന്നതില്‍നിന്ന് വിശ്വാസികളെ വിലക്കും. നേരത്തെ ഏര്‍പ്പെടുത്തിയ വിലക്ക് റമദാനിലും തുടരുമെന്നാണ് അധികൃതര്‍ വ്യക്തമാക്കിയത്. വിശുദ്ധ റമദാനില്‍ ഹറമിലും പ്രവാചക മസ്ജിദിലും തറാവീഹ് നിസ്‌കാരങ്ങള്‍ നടക്കും. ഹറമിനകത്തും മസ്ജിദുന്നബവിയിലും സേവനമനുഷ്ഠിക്കുന്ന ജീവനക്കാരും തൊഴിലാളികളും മാത്രമാണ് ഇതില്‍ പങ്കെടുക്കുക. ഇരുപതു റകഅതിനു പകരം പത്തു റകഅത് ആയി ചുരുക്കുന്ന തറാവീഹ് നിസ്‌കാരത്തിനു രണ്ടു ഇമാമുമാരായിരിക്കും നേതൃത്വം നല്‍കുക. 29ാം രാവിലെ തഹജ്ജുദ് നമസ്‌കാരത്തിലായിരിക്കും ഖത്മുല്‍ ഖുര്‍ആന്‍ പ്രാര്‍ഥന.