പയ്യന്നൂര്‍: പയ്യന്നൂര്‍ നഗരത്തില്‍ നാട്ടുകാരെ വിറപ്പിച്ച് തെരുവുനായകള്‍. രാത്രിയെന്നോ പകലെന്നോ ഇല്ലാതെ സൈ്വര്യവിഹാരം നടത്തുകയാണ് ഇവ. നഗരമധ്യത്തില്‍ സ്ഥിതിചെയ്യുന്ന നലു വിദ്യാലയങ്ങളിലേക്കുള്ള വിദ്യാര്‍ഥികളടക്കം നിരവധി കാല്‍നടയാത്രികര്‍ക്കും ഇരുചക്രവാഹന യാത്രികര്‍ക്കും തെരുവുനായ സംഘം ഭീഷണിയായി തീര്‍ന്നിരിക്കുകയാണ്. പയ്യന്നൂര്‍ പുതിയ ബസ് സ്റ്റാന്‍ഡ്, പഴയ സ്റ്റാന്റ്, ഗാന്ധിപാര്‍ക്ക്, പൊലിസ് സ്റ്റേഷന്‍ പരിസരങ്ങളിലാണ് 30ഓളം തെരുവുനായ്ക്കളുടെ വിളയാട്ടം. കഴിഞ്ഞ ദിവസം മൂന്നുപേരെ കണ്ടങ്കാളിയില്‍ പേപ്പട്ടി കടിച്ചിരുന്നു. ഒരേ സമയം 30 പേരെ വരെ പേപ്പട്ടി കടിച്ചതും പയ്യന്നൂരിലാണ്. നാട്ടുകാര്‍ക്ക് പേടിസ്വപ്‌നമായ നായ്ക്കൂട്ടത്തെ തുരത്താന്‍ അധികൃതരുടെ ഭാഗത്തു നിന്ന് നടപടിയുണ്ടാവണമെന്നാണ് നാട്ടുകാരുടെ ആവശ്യം.