തിരുവനന്തപുരം: പൊന്നാനി ലോക്‌സഭാ മണ്ഡലത്തില്‍ നിലമ്പൂര്‍ എം.എല്‍.എ പി.വി അന്‍വറിന്റെ പേര് വീണ്ടും നിര്‍ദേശിച്ച് സി.പി.എം പാര്‍ലമെന്റ് മണ്ഡലം കമ്മിറ്റി.
കഴിഞ്ഞ ദിവസം സി.പി.എം സെക്രട്ടേറിയറ്റും സംസ്ഥാന സമിതിയും സി.പി.എമ്മിന്റെ 15 സ്ഥാനാര്‍ഥികളുടെയും കാര്യത്തില്‍ അന്തിമ തീരുമാനം എടുത്തിരുന്നെങ്കിലും പൊന്നാനി മണ്ഡലത്തിലേക്ക് മണ്ഡലം കമ്മിറ്റി നിര്‍ദേശിച്ച അന്‍വറിന്റെ പേര് പുനഃപരിശോധിക്കാന്‍ ആവശ്യപ്പെട്ടിരുന്നു. വാട്ടര്‍തീം പാര്‍ക്ക് വിവാദം ഉള്‍പ്പെടെ നിരവധി ആരോപണങ്ങളില്‍ കുരുങ്ങിക്കിടക്കുന്ന പി.വി അന്‍വറിനെ സ്ഥാനാര്‍ഥിയാക്കുന്നത് ഉചിതമാകില്ലെന്ന നിലപാടിലായിരുന്നു സംസ്ഥാന സമിതി. പകരം വിജയസാധ്യതയുള്ള മറ്റൊരു പേര് ലോക്‌സഭാ മണ്ഡലം കമ്മിറ്റിയോട് ആവശ്യപ്പെട്ടിരുന്നു. ഇന്നലെ പാലൊളി മുഹമ്മദ് കുട്ടിയുടെ അധ്യക്ഷതയില്‍ മണ്ഡലം കമ്മിറ്റി ചേര്‍ന്ന് സിഡ്‌കോ ചെയര്‍മാന്‍ നിയാസ് പുളിക്കലകത്ത്, താനൂര്‍ എം.എല്‍.എ വി.അബ്ദുറഹിമാന്‍, മന്ത്രി കെ.ടി ജലീല്‍ എന്നിവരുടെ പേരുകള്‍ പരിഗണിക്കാമെന്ന ചര്‍ച്ചയിലെത്തി. എന്നാല്‍, മന്ത്രിയെന്ന നിലയില്‍ മത്സരിക്കേണ്ടതില്ലെന്ന് കോടിയേരി പറഞ്ഞതിനാല്‍ ജലീലിനെ ഒഴിവാക്കി. മത്സരിക്കാനില്ലെന്ന് അബ്ദുറഹിമാനും നിയാസ് പുളിക്കലത്തും ഉറപ്പിച്ചു പറഞ്ഞതോടെ വീണ്ടും അന്‍വറിലേക്ക് മണ്ഡലം കമ്മിറ്റി എത്തുകയായിരുന്നു. ഇന്ന് രാവിലെ സി.പി.എം സെക്രട്ടേറിയറ്റ് ചേര്‍ന്ന് 16 ലോക്‌സഭാ മണ്ഡലങ്ങളിലെയും സ്ഥാനാര്‍ഥികളെ ഔദ്യോഗികമായി പ്രഖ്യാപിക്കും.