പൊന്നാനി: പൊന്നാനിയില്‍ ക്ഷേത്രത്തിന് സമീപം വന്‍ ആയുധശേഖരം കണ്ടെത്തി. കോട്ടത്തറ കണ്ടകുറുമ്പക്കാവ് ക്ഷേത്രത്തിന് സമീപമാണ് തലപ്പില്‍ ഫുട്പാത്തിലെ കലുങ്കിനടിയില്‍ നിന്നാണ് 14 വടിവാളുകള്‍ കണ്ടെടുത്തത്.
രാവിലെ കലുങ്ക് ശുചീകരിക്കാനെത്തിയ പൊന്നാനി നഗരസഭ തൊഴിലാളികള്‍ ജോലിക്കിടെയാണ് ചാക്കില്‍ പൊതിഞ്ഞ് കുഴിച്ചിട്ട വടിവാളുകള്‍ കണ്ടെത്തിയത്. രണ്ടു വര്‍ഷത്തിലധികം പഴക്കം കണക്കാക്കുന്ന വടിവാളുകളാണ് ലഭിച്ചത്.
തുരുമ്പെടുത്ത നിലയിലാണ്. പെട്ടെന്ന് ആളുകളുടെ ശ്രദ്ധ പതിയാത്ത സ്ഥലമാണിത്. നേരത്തെ ഈ മേഖലയില്‍ രാഷ്ട്രീയ സംഘട്ടനങ്ങള്‍ നിലനിന്നിരുന്നു. ഇതിന്റെ ഭാഗമായി ആരെങ്കിലും ആയുധങ്ങള്‍ ഒളിപ്പിച്ച് വച്ചതാകാമെന്നും സംശയിക്കുന്നു. ആര്‍ എസ് എസിന്റെ ശക്തികേന്ദ്രമായിട്ടാണ് ഈ പ്രദേശം അറിയപ്പെടുന്നത്. സി പി എം പ്രവര്‍ത്തകരുമായി സംഘര്‍ഷം ഇവിടെ പതിവാണ്.ഇതുസംബന്ധമായി നിരവധി കേസുകളും നിലവിലുണ്ട്. സംഭവമറിഞ്ഞ് പൊലീസ് സ്ഥലത്തെത്തി വാളുകള്‍ കണ്ടെടുത്തു.
പ്രദേശത്ത് ആദ്യമായാണ് ഇത്തരത്തില്‍ ആയുധശേഖരം കണ്ടെത്തുന്നത്.