തിരുവനന്തപുരം: സൂര്യാതപത്തിനെതിരേ നാളെ വരെ ജാഗ്രത പുലര്‍ത്തണമെന്ന് സംസ്ഥാന ദുരന്തനിവാരണ അതോറിറ്റി അറിയിച്ചു.

വയനാട് ഒഴികെയുള്ള ജില്ലകളില്‍ താപനില ശരാശരിയില്‍ നിന്നും രണ്ട് മുതല്‍ മൂന്ന് ഡിഗ്രി വരെ ഉയരാന്‍ സാധ്യതയുണ്ട്. താപ തീവ്രതയുടെ തോതും ഉയര്‍ന്നേക്കും. ഇന്നലെ പാലക്കാട് ജില്ലയിലാണ് ഏറ്റവും കൂടുതല്‍ ചൂട് രേഖപ്പെടുത്തിയത്. ഇവിടെ 39.3 ഡിഗ്രിയും പുനലൂരില്‍ 38.6 ഡിഗ്രിയും രേഖപ്പെടുത്തി. തിരുവനന്തപുരം, ആലപ്പുഴ, കോട്ടയം, എറണാകുളം, തൃശൂര്‍, കോഴിക്കോട്, കണ്ണൂര്‍ ജില്ലകളില്‍ ഇന്നലെ 35 ഡിഗ്രിക്കു മുകളില്‍ ചൂട് രേഖപ്പെടുത്തി.
സൂര്യാതപത്തിന് സാധ്യത വളരെ കൂടുതല്‍ ഉള്ളതിനാല്‍ പകല്‍ 11 മണി മുതല്‍ മൂന്ന് മണിവരെ സൂര്യപ്രകാശം നേരിട്ട് ഏല്‍ക്കുന്നത് ഒഴിവാക്കണമെന്ന മുന്നറിയിപ്പ് കര്‍ശനമായി പാലിക്കണമെന്നും അധികൃതര്‍ അറിയിച്ചു.