ചെന്നൈ: പ്രീമിയര്‍ ഫുട്‌സാല്‍ ലീഗിലെ ആദ്യ ജയം മുംബൈ ഫൈവ്‌സിന്. ചെന്നൈ ഫൈവ്‌സിനെ രണ്ടിനെതിരേ നാലു ഗോളുകള്‍ക്കാണ് മുംബൈ തകര്‍ത്തത്. ഫോഗ്ലിയ ഇരട്ട ഗോളുകള്‍ നേടിയപ്പോള്‍ കെവിന്‍ റാമിറസ്, ആന്‍ജലോട്ട്, എന്നിവര്‍ ശേഷിച്ച ഗോള്‍ നേടി. ഫാല്‍ക്കാവോ, ഫില്‍ഹ എന്നിവര്‍ ചെന്നൈയുടെ ഗോളുകള്‍ നേടി. കളിയിലുടനീളം  മികച്ചുനിന്ന മുംബൈയുടെ പ്രതിരോധമാണ് ചെന്നൈയ്ക്ക് ജയം നിഷേധിച്ചത്. അവസാന ഘട്ടത്തില്‍ തുടരെ രണ്ടു ഗോള്‍ നേടിയെങ്കിലും പിന്നീട് സ്‌കോര്‍ ചെയ്യാന്‍ ചെന്നൈയ്ക്കായില്ല.
രണ്ടാം മത്സരത്തില്‍ കൊല്‍ക്കത്ത ഇതേ സ്‌കോറിനു ഗോവയെ പരാജയപ്പെടുത്തി. ആദ്യ പകുതിയില്‍ രണ്ടു ഗോളിന് മുന്നിട്ടു നിന്ന കൊല്‍ക്കത്തയ്‌ക്കെതിരേ തുടരെ രണ്ടു ഗോള്‍ നേടി സമനില പിടിക്കാന്‍ ഗോവയ്ക്ക് സാധിച്ചിരുന്നു. എന്നാല്‍ അവസാന നിമിഷത്തെ മികവ് കൊല്‍ക്കത്തയ്ക്ക് ജയം സമ്മാനിക്കുകയായിരുന്നു. പ്യൂല, മുഹമ്മദ് ഇസ്‌ലാം, ക്രെസ്‌പോ കൊല്‍ക്കത്തന്‍ നിരയില്‍ ഗോള്‍ നേടി. ശേഷിച്ച ഗോള്‍ സെല്‍ഫായിരുന്നു. ഗോവയ്ക്ക് വേണ്ടി റാഫേല്‍, സാന്റോസ് എന്നിവര്‍ ഗോള്‍ നേടി.