വാഷിങ്ടണ്‍: ഉത്തര കൊറിയയില്‍ ആക്രമണം ഉടനെയെന്ന് സൂചന നല്‍കി യു.എസ് പ്രസിഡന്റ് ഡൊണാള്‍ഡ് ട്രംപ് വൈറ്റ്ഹൗസില്‍ സെനറ്റര്‍മാരുടെ അസാധാരണ യോഗം. ബുധനാഴ്ച ഉച്ചതിരിഞ്ഞ് 100 സെനറ്റര്‍മാരെയാണ് ട്രംപ് യോഗത്തിന് വിളിച്ചത്. ഉത്തര കൊറിയന്‍ വിഷയമാണ് യോഗത്തിന്റെ അജന്‍ഡ.
യു.എസ് പാര്‍ലമെന്റായി അറിയപ്പെടുന്ന കാപിറ്റോളിലെ രഹസ്യ മുറിയിലാണ് ആദ്യം യോഗം തീരുമാനിച്ചിരുന്നത്. പിന്നീട് ഇത് വൈറ്റ്ഹൗസിലേക്ക് മാറ്റുകയായിരുന്നുവെന്ന് സെനറ്റര്‍മാരെ ഉദ്ധരിച്ച് റോയിട്ടേഴ്‌സ് റിപ്പോര്‍ട്ട് ചെയ്തു. യോഗത്തിന് ശേഷം ഉച്ചതിരിഞ്ഞ് മൂന്നിന് വാര്‍ത്താ സമ്മേളനമുണ്ടാകും. പ്രതിരോധ സെക്രട്ടറി ജെയിംസ് മാറ്റിസ്, വിദേശകാര്യ സെക്രട്ടറി റെക്‌സ് ടില്ലേഴ്‌സണ്‍ എന്നിവരും യോഗത്തെ അഭിസംബോധന ചെയ്യും. അമേരിക്കയിലെ അസാധാരണ യോഗം ലോകത്തെ ആശങ്കയിലാഴ്ത്തിയിട്ടുണ്ട്.