റോം: ഇറ്റാലിയന്‍ ലീഗായ സീരി എയില്‍ കിരീട പ്രതീക്ഷയുമായി യുവന്റസ് ഇന്നിറങ്ങുന്നു. സ്പാലിനെതിരേയുള്ള മത്സരത്തില്‍ യുവന്റസ് ജയം നേടുകയാണെങ്കില്‍ ലീഗില്‍ കിരീടം സ്വന്തമാക്കാം. കഴിഞ്ഞ ആഴ്ച നടന്ന മത്സരത്തില്‍ നാപോളി സമനില വഴങ്ങിയതോടെയായിരുന്നു യുവന്റസിന് കാര്യങ്ങള്‍ എളുപ്പമായത്. 31 മത്സരത്തില്‍ 64 പോയിന്റാണ് ഇപ്പോള്‍ നാപോളിക്ക് ഉള്ളത്. യുവന്റസിന് 84 പോയിന്റും. ഇനി എല്ലാ മത്സരങ്ങളും വിജയിച്ചാല്‍ പോലും നാപോളിക്ക് 85 പോയിന്റ് മാത്രമേ ആകൂ. ഇന്ന് കിരീടം നേടുകയാണെങ്കില്‍ യുവന്റസിന്റെ തുടര്‍ച്ചയായ എട്ടാം ലീഗ് കിരീട നേട്ടമാകും ഇത്. സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ ആദ്യ ഇറ്റാലിയന്‍ ലീഗ് കിരീട നേട്ടവും ഇന്ന് നടക്കും. പക്ഷെ ഇന്നത്തെ മത്സരത്തില്‍ ക്രിസ്റ്റ്യാനോയെ ടീമിലുള്‍പ്പെടുത്തിയിട്ടില്ല.