അന്തിക്കാട്: ഭാര്യയും മക്കളും ഉപേക്ഷിച്ച 65 കാരനായ അബ്ദുല്‍ മജീദ് ഇനി സ്‌നേഹസാഗരത്തിന്റെ തണലില്‍. പ്രമുഖ മതപ്രഭാഷകനും സമസ്ത കേരള ജംഇയ്യത്തുല്‍ ഉലമ തിരുവനന്തപുരം ജില്ലാ സെക്രട്ടറിയുമായ നൗഷാദ് ബാഖവി ചിറയിന്‍കീഴ് നേതൃത്വം നല്‍കുന്ന സ്‌നേഹസാഗരം ഫൗണ്ടേഷനാണ് മജീദിനെ ഏറ്റെടുത്തത്.
സ്‌നേഹസാഗരത്തിന്റെ തൃശൂര്‍ ജില്ലയിലെ പ്രവര്‍ത്തകരായ ഷാഫി മുറ്റിച്ചൂര്‍, ജാബിര്‍ ചളിങ്ങാട് എന്നിവരെത്തി ഇയാളെ സ്‌നേഹസാഗരം അഗതിമന്ദിരത്തിലേക്ക് അയച്ചു. തളിക്കുളം പത്താംകല്ല് സ്വദേശിയായ അമ്പലത്ത് വീട്ടില്‍ അബ്ദുല്‍ മജീദ് 24 വര്‍ഷം വിദേശത്തായിരുന്നു. പിന്നിട് അസുഖമായി നാട്ടില്‍ തിരിച്ചെത്തി. ഷുഗര്‍ ബാധിച്ച് ഒരു കാല് മുറിച്ചു മാറ്റുകയും ഒരു കാലിന്റെ വിരലുകള്‍ മുറിച്ചുകളയുകയും ചെയ്തു. ഇതോടെ ഭാര്യയും മക്കളും ഇയാളെ ഉപേക്ഷിച്ചു. പിന്നീട് സഹോദരിയാണ് ഇദ്ദേഹത്തെ വര്‍ഷങ്ങളോളം പരിചരിച്ചത്. തുടര്‍ന്ന് ബന്ധുക്കള്‍ വിവരമറിയിച്ചതിനെ തുടര്‍ന്ന് സ്‌നേഹ സാഗരം ഫൗണ്ടേഷന്‍ മജിദിനെ ഏറ്റെടുക്കുകയായിരുന്നു. ജീവിതത്തിലെ ഒറ്റപ്പെടലിന്റെ വേദനകള്‍ മറന്ന് വളരെ സന്തോഷത്തോടെയാണ് മജീദ് സ്‌നേഹസാഗരം അഗതിമന്ദിരത്തിലേക്ക് യാത്ര തിരിച്ചത്.
സ്ത്രീകളും പുരുഷന്മാരുമുള്‍പ്പെടെ 35 പേരാണ് അഗതിമന്ദിരത്തിലുള്ളത്. സമസ്ത കേരള ജംഇയ്യത്തുല്‍ ഉലമയുടെ തിരുവനന്തപുരം ജില്ലാ സെക്രട്ടറിയായ നൗഷാദ് ബാഖവി തന്റെ മകന്‍ മുഷ്ത്വാഖിന്റെ മരണശേഷമാണ് ഇത്തരമൊരു സേവനത്തിലേക്ക് തിരിഞ്ഞത്. ജീവിതത്തില്‍ ഒറ്റപ്പെട്ട് വേദനിക്കുന്ന ആളുകളാണ് ഇവിടെ അന്തേവാസികളായി എത്തുന്നത്.രോഗികളായി എത്തുന്നവര്‍ക്ക് നല്ല പരിചരണം നല്‍കി അവരെ ജീവിതത്തിലേക്ക് തിരിച്ചു കൊണ്ടുവരികയെന്നതാണ് സ്‌നേഹസാഗരത്തിന്റെ ലക്ഷ്യം. മനുഷ്യാവകാശ പ്രവര്‍ത്തകനും പ്രഭാഷകനുമായ പനവൂര്‍ സഫീര്‍ ഖാന്‍ മന്നാനിയുടെ നേതൃത്വത്തില്‍ 10 ജീവനക്കാര്‍ ഇവിടെയുണ്ട്. 250 ലേറെ പേര്‍ രോഗം ഭേദമായി ഇവിടെ നിന്നും തിരിച്ചു പോയിട്ടുണ്ട്. വര്‍ഷങ്ങളായി ഒറ്റപ്പെടലിന്റെ വേദനകള്‍ പേറി കഴിയുന്നവരാണ് അഗതിമന്ദിരത്തിലെത്തുന്നത്. തീവണ്ടി അപകടത്തില്‍പ്പെട്ട് ഇരുകാലുകളും നഷ്ടപ്പെട്ട തമിഴ്‌നാട് സ്വദേശി സുബ്രഹ്മണ്യനും ജീവിതത്തില്‍ ഒറ്റപ്പെട്ട കര്‍ണാടക സ്വദേശിനിയും അഗതിമന്ദിരത്തിലെ അന്തേവാസികളാണ്.